Wow kanay lawas!

Gula 6

Higayon na g’yud unta ni Rodel nga panguyaban niya’g maayo si Alfie kay sila ra’ng duha ug walay makabalda kanila, apan nabalaka siya nga basin magtoo unya ang dalaga nga abusado ra kaayo siya.

Pagka-ugma, giubanan gihapon ni Rodel si Alfie nga nag-asikaso sa iyang mga clearances. Sa ilang panag-uban, dali ra g’yud kaayo sila nga nasuod. Ning ikaduhang adlaw sa ilang panag-uban, karsones-maong ang gisul-ob ni Alfie ug gi-insert ang T-shirt nga adunay kwelyo.

Misamot ang kaanyag ni Alfie. Nakita na gayud ni Rodel ang kinatibuk-ang pamorma sa lawas sa dalaga. Nagtubod ang iyang laway nga nagpasiklap sa madanihong lawas ni Alfie.

Nakapangagho si Rodel. “Naunsa ka Rod? Duna ka’y problema?” gisukna ni Alfie si Rodel. “Wala uy, nagtubod man gud ang akong laway nga magsud-ong sa kamadanihon sa imong lawas Alfie. Sus mabuang ko,” ni Rodel pa nga nagpanglingo-lingo.

“Saba diha uy,” matud ni Alfie nga nagpahiyom. Mora’g nakasabot na g’yud ang dalaga nga naibog kaniya si Rodel. Sayo sila nga nahuman paglukat og police clearance ug city health certificate.

“Kaila ‘sab diay nimo kadto si Dr. Daisy Villa nga maoy city health officer?” gipangutana ni Alfie si Rodel. “Dili baya mi kaila niya, ako lang to nga giatik-atekan aron pirmahan dayon ang imong clearance,” ni Rodel pa. Giingnan ni Alfie si Rodel nga mopauli usa siya sa boarding house kay gusto siya nga mopahuway. Gipasakay ni Rodel og taksi si Alfie. “Magteksanay lang ta Rod,” matud ni Alfie sa dayong sakay niini sa taksi.

Nakahukom si Rodel nga mosuroy siya sa mall sa Cebu Business Park. Gilingaw ni Rodel ang iyang kaugalingon sa pagpili-pili og mga baligya bisan og wala siya’y plano nga mopalit.

Taud-taud, mitingog ang message alert sa iyang selpon. Si Alfie diay ang nag-text kaniya. “Mingaw diri Rod uy, maypag gipaari tka sa bording hauz,” ni Alfie pa sa iyang text.

Gi-reply dayon ni Alfie. “Huwat r btw k nga imng ingnon ganina. Anha ko.” Taud-taud, nadawat ni Rodel ang reply ni Alfie “K. dali.”

Misirit si Alfie sa paggawas sa mall. Misakay dayon siya’g taksi ug nagpahatud sa Barangay Lahug. Nahuna-huna ni Rodel nga karon na ang tukma nga panahon nga suknaon niya ang dalaga mahitungod sa iyang gugma.

Pagkanaug ni Rodel sa taksi, milakaw dayon siya subay niadtong gamay’ng agianan nga sa tumoy atua mahimutang ang boarding house ni Alfie.

Giteksan dayon niya ang dalaga. “Dia na ko Alfie sa gawas.” Wala madugay, mibukas ang pultahan ug nabantang ni Alfie ang panagway ni Alfie nga nagsul-ob lang og short pants. - Sumpayan