Tungod sa kaguwapo

Mokuyog ka’s imong amahan?” ni Marita ngadto’s iyang apo nga si Mila, 8 anyos. Nigukod sa iyang papa ug nigunit sa tuong kamot samtang padulong sa pultahan kay mobiya na.

“Pa, ayaw’g lakaw. Ayaw mi’g biyae si mama Marly,” ni Mila nga naghilak na.

“Wa ko’y mahimo anak. Kay gihinginlan na ko sa imong mama. Kay wa ko’y pulos nga pagkabana. Wa ko’y natampo sa atong pamilya,” ni Berto sa subong tuno.

“Tinuod na, ma?” ni Mila nga nilingi sa iyang mama sulod sa sala sa ilang balay.

“Pangutan-a imong amahan!” ni Marly.

“Tinuod na pa?” ni Mila. Naggunit gihapon sa tuong kamot sa amahan. Gibirabira ang bukton. Nitubod na ang mga luha ni Mila nga naghangad sa nawong sa iyang amahan.

Puro maayo’g trabaho ang bana’g asawa nga si Berto-Marly. Tingali wa pa’y trabaho si Berto sa bag-o pa silang minyo. Maong si Marly, nga receptionist sa usa ka five star hotel, ang nagsuportar sa tibuok pamilya. Siya ang nagbayad og down payment sa ilang balay ug lote sa baryo Lisngalong. Siya ang nagbayad sa binulan nga datahan. Siya ang naggasto sa ilang konsumo mata’g adlaw. Siya ang nagbayad sa konsumo nila sa tubig, kuryente, LPG ug telepono. Way natampo bisa’g peso si Berto. Bisa’g sa pag-eskuyla ni Mila nga grade two na sa pribadong eskuylahan, si Marly gihapon ang nagbayad sa tuition.

Unya dihang nakatrabaho si Berto sa banko isip teller, tagsa na lang mahiuli sa balay. Ingon ani ilang kahimtang sulod sa tulo ka tuig. Nasabot ni Marly nga mouli lang iyang bana kun hidlawon niya.Ug wa na kaagwanta si Marly. Naupos na iyang pasensiya sa iyang bana.

“Tinuod na, anak,” malumong pag-angkon ni Berto.

“Asa man diay padulong imong suweldo?” ni Mila.

“May lain kong pamilya,” ni Berto.

“Waaaaa! Iresponsable kang pagkaamahan ug pagkabana, pa. Dili ko mokuyog nimo!” nalitok ni Mila bisan sa kalinghod sa iyang pangisip.

“Mao diay’ng puwerte gyud nimong dawoa. Di gani ka kapalit og pan nako kun mouli ka. Di gani ko nimo madala’g suroy sa park bisan kadiyot. Grabe! Di gani ka kahatag og pabawon nako sa eskuylahan,” ni Mila. Gibuhian ang kamot sa amahan. Nidagan siya ngadto’s iyang mama. Nigakos. Namahid sa luha si Marly. Hasta sab si Marita nga maoy yaya sa iyang apo.

Minghoy ug huyhoy ang abaga ni Berto nga nanaug sa panimalay sa iyang asawa nga kinaslan. Way lingilingi. Kay wa gyud siya’y natampo nga kuwarta bisa’g peso sa pamilya niya sa sulod. Grabe gyud kahimtanga. Daw di  katuhoan. Apan maoy tinuod. Nagpaubos man gud og maayo iyang asawa sa dugay’ng panahon. Tungod sa kaguwapo ni Berto. (Katapusan)