Wala’y plano sa life

Dear Tita Salie,

Hello! Good morning kaninyong tanan esp. to you. Tagoa lang ko sa ngalan nga Miss Confuse and my problem is about my lovelife and family life.

Duna ko’y live-in partner, five years na mi nga nagtipon ug dunay duha ka buok anak. Pait kaayo ang among kinabuhi, Tita Salie, tungod kay kining akong partner wala’y plano sa iyang life ug sa among pamilya.

Dugangan pa nga nagbisyo siya. Mogamit og drugas ug namabaye pa gyud. Gikapoyan na gyud ko niining among kahimtang, Tita Salie. Gusto unta nako nga mobiya na lang sa among pamilya apan maluoy man ko sa among mga anak. Unsa may maayo nakong buhaton? Palihug pasabta intawon ko. Salamat sa pagtagad mo, Tita Salie, ning akong problema.

* * *

Good day,

Imo na bang nabuhat ang tanan nga pakiluoy kaniya aron mag-usab siya? Inyo na bang nasulayan nga ikaw ug ang inyong mga anak mihangyo sa imong bana nga magbag-o na siya tungod ug alang sa inyong pamilya?

Kun  imo na nga nasulayan ang tanang paagi apan wala gihapon siya mag-usab ug wala mo niya panumbalinga, mao na seguro karon ang hustong higayon nga maningkamot ka pagpangita’g trabaho aron imong mabuhi ang imong mga anak. Ug hunong sa pagsalig nianang tawo nga wala’y pangandoy sa kinabuhi.

Kun ugaling mulakaw ka, dad-a gyud ang imong mga anak kay makaluluoy gyud ang mga bata kun imo silang biyaan diha sa ilang amahan. Ug ayaw kahadlok sa pagdala kanila tungod kay ikaw ang dunay katungod nga moatiman nila tungod kay ikaw man ang ilang  inahan. -- Tita Salie