Tagay ibabaw sa kamay

Ang tagay nagpasabot og pagdimdim, pag-inom ug pagsawo sa usa ka ilimnon tali sa mga binuhat nga gibugkos sa diwa sa panaghigalaay. May tagay nga gilarawan sa himaya ug pagminahalay. Dili hitupngan ang bation kun ikaw mobati og kalipay sa tagay ilabi na kun kini magsukad ibabaw sa kamay.

“Tasyo, ganina ka pa man nakong nakit-an nga gasige og yarok nianang tuba nga kisomkisom. Wala ka pa mahubog?” sukna ni Iyoy.

“Maayo kay naabot ka Bay Iyoy. Dali magtagay ta.  Gusto kong malimot sa akong kaugalingon puslan mang wala’y nagmahal,” pulong ni Tasyo ngadto sa iyang higala.

Nahimutang sila atubangan sa tubaan ni Inse Barang. Nagtagsa sila og yaka sa bankito.

Wala madugay...

“Tasyo, unsa may nahitabo nimo?” may tingog nga mibuak sa panagtagay sa managhigalang Tasyo ug Iyoy.

Miyahat si Tasyo. Wala tuyoang mikuba ang iyang dughan sa iyang nakita. Daw dili makatuo.

“Day Tery, ikaw ba? Abi ko man gud midayon ka og larga.”

“Sus, ikaw gyud Tasyo dali ka ra kaayong motuo. Gisuwayan lang tika og unsay imong bation kun mananghid na ko nimong molalin sa ubang lugar aron manimpalad. Apan ania. Wala man ko makaako og pahilayo. Nahinumdom man gud ko sa imong gisaad nga tagay.”

“Ah, este Day Tery nagtagay mi ron ni Tasyo niining tuba. Mao ni ang tagay,” sal-ot nga timang ni Iyoy.

“Unsaaa?? Kalain gud nimo Tasyo. Tuba diay ang tagayon sa imong gisaad nako?”

“Sus, ayaw pagtuo ni Iyoy Day Tery. Manglakaw hinuon ta. Nalipay kaayo ko nga mibalik ka. Nalipay ko. Salamat. Gimahal gyud diay ko nimo.”

“Yuna pa asa man ta?”

“Asa pa. Magtagay tang duha sa kalipay nga magsukad ibabaw sa kamay,” dala kawhat ni Tasyo sa lumoy kaayong kamot ni Tery.

Nitiurok makadiyot si Tery sa nadungog apan gipulihan ang iyang kahingangha og pahiyom.  Andam na siyang makigtagay uban ni Tasyo aron tugkaron ang katam-is sa tagay  ibabaw sa kamay. (Kataposan)