Daghang guwapa

Ah! Mao diay’ng ganahan kang mutambong ining Toastmaster’s Meeting, kay daghan mang guwapang mga miyembro!” ni Mira, ngadto sa iyang bana nga si Romy, tupad niya sa wala, sa lamesa nila sulod sa Green Meadow Auditorium ning dakbayan.

May tono sa pagselos ang pulong ni Mira ngadto sa iyang bana ning sayong kagabhion. Bag-o lang gipailaila ni Romy iyang kapikas sa tanang mga opisyales sa ilang grupo.

Nakabuhi’g lawom nga panghupaw si Romy. Nasayod man siya sa kaselosa sa iyang asawa. Gani, sa kada meeting sa mga toastmasters, iya gyung pakuyogon iyang asawa. Apan magsige’g balibad. Di lang kay kanapulo lang agniha. Unya, dihang na Presidente si Romy nga usa ka CPA, sa ilang toastmasters group, nikuyog si Mira kay nakuryoso kun unsa gyud ning toastmasters.

Chief Accountant si Romy sa Jearim Corporation nga usa ka land developer. Tungod sa iyang posisyon, automatic nga miyembro siya sa Jearim Toastmasters Group. Kining toastmasters, usa ka kapunongan nga nag-agni sa mga sakop nga magbansay sa ilang pagpanulti sa pulong Iningles. Ingnon ta, speech improvement. Kasagaran ginganlan og public speaking. Mosulti ang kada miyembro atubangan sa mga tawo. Ug sa kada meeting mao gyuy mahitabo. Niining meeting karong gabhiona, dala ang panihapon. Dunay monthly dues ang mga miyembro. Apan kang Romy gibayran ra sa kompaniya. Maong mapugos gyud siya sa pagtambong ining ilang mga kalihokan.

“Ganahan ko’g sa dili, mutambong man gyud ko ini. Kay maikog ko’s akong boss. Gilibre ko’g membership fee ug monthly dues. Maong mutambong na lang ko’g ahat.

Nindot man sab ni. Sosyalan. Tsika tsika. Pero ayaw ko’g akusaha nga tungod kay daghang guwapa, ganahan kong mutambong. Mga minyo na man na silang mga guwapaha. Ug kun may daga pa, may mga uyab na. Gawas pa, sa kada meeting, giagni man tika’g pakuyog. Unsa na man lang gani ron nga nakakuyog ka,” ni Romy. Nipasabot sa malumong pulong.

“Tinuod man akong gisulti. Daghang guwapa,” ni Mira.

“Pero, di man ko guwapo. Ikaw ra may gigwapohan nako. Busa, di ka angay magselos,” ni Romy. Nahilom sila kadiyot. Ug nanindog kay nianunsiyo ang MC nga kantahon ang Pambansang Awit. Samtang gipatingog pa ang sound system, nihunghong si Romy sa kapikas.

“Mao bitaw’ng dad-on tika sa meeting, aron makita sab nila imong beauty. Aron makaingon sila nga bisa’g di guwapo si Romy, guwapa og asawa,” nakapahiyom na si Mira.

Gikusi ang tuong kilid ni Romy. (Kataposan)