Gipasanginlan

Dear Tita Salie,

Maayong adlaw kanimo. Pagkasulay nako og basa og Banat News labi na sa imong column, nahagit dayon ko pagpadala sa akong problema aron imo kong matabangan.

Tagoa lang ko sa ngalang Rodita, 36 yrs old ug usa ka biyuda ug dunay usa ka buok anak nga 6 years old na.

Taga Negros gyud ko, Tita Salie, apan karon nia ko nagpuyo sa San Remegio, Cebu, tipon sa akong inahan.

Wala man gud ko’y kabinlan sa akong anak kun manginabuhi ko mao nga nakahukom ko nga motipon sa akong inahan.

Sa bag-o pa, pinangga mi sa akong inahan apan sa kadugayan nausab ang tanan. Pirme na lang mi mag-away ug iya pa ko gipasanginlan nga ako daw siyang gitukmod. Karon naglagot kaayo nako ang akong mga igsuon ug gibaharang patyon.

Unsay akong angay nga buhaton, Tita Salie? Mouli na lang kaha ko sa Negros? Palihog pasabta ko. Thank you.

* * *

Good day,

Usahay bitaw ingon sa dili nato masabtan ug lisod dawaton ang kamatuoran nga ang atong pamilya usahay maoy motukmod nato ngadto sa kaalautan.

Tingali kun dili gusto ang imong inahan nga anaa ka mitipon kanila ug imo pa siyang gipabantay sa imong anak. Mao nga gihimoan ka og estorya aron maglagot ka ug mohawa ka sa ilang balay.

Mas maayo seguro kun mangita ka og laing kapuy-an. Pangita og bisan gamay nga kuwarto nga imong abangan alang kanimo ug sa imong anak. Imo na lang i-budget ang imong suweldo o income alang sa inyong inadlaw nga gastohan.

Puwede ka mangayo og tabang sa imong mga relatives ug sa kaliwatan sa imong bana nga nakasabot sa imong kahimtang.

-- Tita Salie