Police lover

Gula 5

Wala tuod magdugay si Jack, miabot kini kauban sa pipila ka polis nga luwan sa usa ka kotse. Wala dayon manaog sila si Jack. Gikontak niini si Tina ug gipangutana hain ang tawo nga mamugos nga sila magdeyt.

“Kanang anaa nagbarog sa unahan sa pultahan sa Wild Orchids Bar ug nagsigi’g atubang diri sa sulod,” matud ni Tina nga daw nagkurog sa kahadlok ang tingog.

“Sige, gawas diha ug lakaw, dia mi sulod niining kotse nga itom atbang sa bar. Kami na ang bahala,” giingnan ni Jack si Tina. Gipakanaog ni Jack ang duha niya ka kauban ug nagpaduol sa mao nga tawo.

Ang duha ka polis nagpatoo nga mopalit og sigarilyo sa usa ka sidewalk vendors. Nakita na ni Jack nga migawas na si Tina sa pultahan sa bar. Wala gayud mosipyat, gisugat dayon siya ni Bert.

Mipaspas paglakaw si Tina aron mapalayo siya ni Bert apan gigukod siya ug gigunitan ang bukton. Pwerteng nakalugnot ni Tina aron makalingkawas sa paggunit ni Bert kaniya.

Gisikaran ni Tina ang atubangan ni Bert mao nga nabuhian ang iyang bukton. Apan misamot kaagresibo si Bert. Nagdali si Jack nga migawas gikan sa kotse aron matabangan niya si Tina.

“Berto Lungon! Ayaw’g hilabti si Tina!” milanog ang tingog ni Jack. Napalingi si Bert dihang gilitok ang iyang ngalan sa tawo nga wala niya dayon mailhi.

Gitionan og armas ni Jack si Berto ug gimandoan nga mosurender. Abtik kaayo ang duha ka polis nga miduol ni Berto ug girekisa. Nakuha ang usa ka kalibre 45 nga giluklok sa luyong bahin sa iyang karsones.

“Ikaw diay ni sir Jack?” matud ni Bert nga nakalitan. Giposasan dayon siya sa duha ka polis nga kauban ni Jack. “Abusado ka Bert. Wala kay respito sa usa ka babaye nga dili gusto nga makigdeyt kanimo!” pintok gihapon ang sinultihan ni Jack.

Gidala nila si Jack sa presento 2. Gipauban usab ni Jack ang bar dancer nga si Tina. Didto sa police station, gisuginlan ni Jack si Tina nga dugay na sila nga nangita ni Bert kay nalambigit kini sa daghang mga pagpamatay dinhi sa dakbayan ug usa ‘sab siya ka bigtime pusher.

“Iya ko nga gidid-an nga dili makigsuod nimo kay nakakita diay siya nga nagtibol ta ganina. May atraso kuno ka sa ilang grupo apan wala motug-an kun ngano,” saysay ni Tina kang Jack.

Igo lang miyango-yango si Jack. Giabisohan ni Jack ang duha ka polis nga bantayan pag-ayo si Bert. “Ihatod usa tika sa imong gipuy-an Tin,” matud ni Jack.  (Sumpayan)