Ang dautan nga nakasud sa langit

Sukad masukad di gyud ganahan si Robito maminaw sa mga wali sa pari. Kay unsaon maghisgot man gyud kini nga ang mga dautang tawo igkamatay mahisugba man gyud sa kalayo sa impiyerno.

Tuslokon pa ang ilang lubot sa bangkaw nga tuloy sima nga kanunay’ng gikuptan sa sungayan, puwa’g mata, ikogan ug bati’g nawong nga demonyo. Diin didto magkagot ilang mga ngipon, wa nay kaluwasang maangkon. Kung atong himoa’g termino “Soul Sentence” na ni.

Apan karong higayona wa lang niya damha nga gibayaw siya sa cloud 9, nga nakadungog sa wali sa pari, nga daw nilaban nilang mga dautan. Bisa’g wa siya mosud sa simbahan, iya man kining madunggan pinaagi sa trumpa nga diha ibabaw sa simbahan. Nasawod gyud sa iyang imbudohong dunggan nga ang mga dautang tawo makasud sab sa ganghaan sa langit, matud sa pari.

Di gyud kuno siya masayop sa iyang nadungog kay sa wa pa siya moari sa simbahan aron manguot, gilimpyohan kini niya iyang dunggan. Kanunay kini niyang atulihan. Ingna kay ngano? Ingna dayo’g ngano? Ooops! Aylang mo’g paningka, ha. Kay mabungol ta.

Kana tungod aron dili siyang makadipalar nga naay nakabantay nga mga polis o sibilyan nga manguot siya. Igmat kaayo siya nga mangunguot. Wa gyuy nakadakop kay binuligan gyud siya sa demonyong sapyot og lubot.

Naengganyo gyud siya sa pagpaminaw sa wali sa pari. Tiaw mo’y bisa’g unsa pa kadautan ang tawo ... ma-rapist, ma-tulisan, ma-killer, ma-tikasan. Makasud gihapon kini sa langit. Gani, ang uban kuno niini gihimo pang mga Santos. Na! ma-san Robito, na hinuon tingali siya ining kalakiha -- ang Santos sa mga mangunguot.

Nakatawa siyang naghunahuna. Nag-ingon pa gyud ang Pari, ang Ginoo, wa moanhi alang sa mga matarong. Ang langit kabulahanang hingpit. Wa nay kaguol, kasakit. Di ka na uhawon ug gutomon. Sa ato pa, di na kuno siya manguot didto. Nakapangandoy siyang malangit.

“Yes! makasud diay ko sa langit ini,” ni Robito nga pinakumo pa ug gibira paubos.

“Ang Ginoo, wa moari alang sa mga matarong kun di sa mga dautan aron tanoson ang ilang mga hiwi nga binuhatan, giyahan sila sa husto nga dalan sa kaluwasan.

Busa kun ikaw usa man karon ka dautan, biyai kanang tanan. Pagbag-o na. Ug sunod sa mando sa labaw  tang gamhanan, aron makab-ot mo ang kinabuhi nga puno sa kalipay nga way katapusan. Amen!” panapos sa pari.

Nahinuklog si Robito. Nakaduko siya sa iyang ulo. Inakob ang mga kamot. Dayong ingog “Amen! Amen!” (Katapusan)