Doktrina mahitungod sa sud-an

Usa sa akong New Year’s Resolution mao ang pagsangyaw sa kamatuoran gikan sa Bibliya. Una sa tanan, ako binunyagan nga Katoliko. Apan dili ko panatiko nga Katoliko. Nasayud na tingale mo unsay gipasabot sa pulong “panatiko” o fanatics. Kanang closed o narrow minded na nga Katoliko.

Apan dili ko mo-look down og bisan unsa nga tawo tungod lang sa iyang tinoohan. Ang di lang nako ganahan, ang tawo nga ubos iyang pagtan-aw sa tawong dili membro sa iyang grupo. Akong isugyot nila ang pagtan-aw makadaghan sa salidang “Kingdom of Heaven” nga gipapelan nilang Liam Nesson ug Orlando Bloom.

Sa batan-on pa ko, dugay kong  kuyogkuyog ni anhing lolo Filemon (manghud sa akong lola Aman, inahan ni Mama Naty). Nakaingon ko nga Catholic Defender to siya. Kay himasa kaayo og Bibliya. Ug brayit kaayo mahitungod sa Bibliya. Pero ginganlan to siya’s iyang mga higala nga Walking Encyclopedia. (Amahan siya ni Father Soc Saldua). Daghan kong nakat-unan ni lolo Filemon.

Usa sa akong nakat-onan, mahitungod sa dili pagkaon og baboy. Daghang Christian Religion (moingon lang ko Christian religion basta motuo sa Bibliya ug motuo ni Jesus Christ) nga dili mokaon og baboy. Kay kono makasala sila kun mukaon. Gipasabot ko ni lolo Filemon nga sayop sila. Kay matud pa ni Jesus Christ, ang mosulod sa baba sa tawo, dili maoy makahugaw sa tawo. Wa gyud nako malimti hangtud karon. Hayskul pako nga nakahinabi  sa akong lolo mahitungod ini. Pero dili pa ko hilig mobasa og Bibliya adtong panahona. Bugoy-bugoy pa akong hilig kaniadto. Pero, sugod 1979, nagbasa na ko’g Bibliya. Hangtud karon. Ug gipangita to nakong mga pulong ni Jesus mahitungod sa butang nga nasulod sa baba sa tawo.

Kay wa man lagi koy Binisaya nga Bibliya, King James version, ra man, ako lang ning i-quote dinhi:

“Not that which goeth into the mouth defileth a man; but that which cometh out of the mouth, that defileth a man” (Matthew 15:11).

“Do not ye yet undertstand that whatsoever entereth in at the mouth goeth into the belly, and is cast out into the draught?” (Matthew 15:17).

“But those things which proceed out of the mouth came forth from the heart, and they defile the man” (Matthew 15:18).

Ang dili mokaon og baboy for health reasons, husto. Pero for religious reasons, no basis from the New  Testament. Way basihan.  Sa Old Testament hinoon, hugaw ang baboy. Apan kun gitahod nato si Jesus, igo na iyang pulong.

Unya moingon ra ba dayon ta “Jesus said, I am the way, the truth and the life.” Busa, kun si Jesus ang truth, tinood o kamatuoran, nganong dili man nato ibasi sa iyang mga pulong atong tinuhoan?

Higayon na nga tukion nato ang mag doktrina sa atong pundok, kun na-subay ba sa pagtulun-an ni Jesus. Kay kun wala, rawraw lang ta. Mora tag buta nga nagguyod og laing buta. (Kataposan)