Isla Paraiso - Gula 98

“Nganong nabalaka ka man mahitungod niana?” ni Rey pa. “Ingna hinuon nga mogaan na unya ang imong problema kun aduna man sanglit duha na man kita nga magtambayayong sa pagpangita’g kasulbaran niini.” “Nahadlok ako, Rey,” ni sister Veronica pa nga seryoso kaayo ang panagway.

“Unsay gikahadlokan mo?” Ligdong ang nawong ni Rey nga nangutana sa madre.

“Nga basin og mosamot og kalitselitse ang akong kinabuhi  kun sudlan ko ang usa ka butang nga wala ko masinati pag-ayo.”

“Nganong nakaingon ka man nga wala ka pa masinati? Dili ba may kasinatian ka na man sa pagpanarato? Milungtad og dugay ang relasyon ninyo ni Jonathan ug ayaw ko’g ingna nga wala ika’y nakat-onan sulod sa maong gidugayon.”

“Lahi ang kaniadto ug karon, Rey. Managlahi na ang situwasyon.”

‘Wala ka ba diay pagsalig kanako, sister Veronica?”

“May pagsalig ako kanimo, Rey.”

“Kun mao nganong nagduhaduha ka pa man sa pagdawat sa akong gugma?”

“Dili lang ko buot nga masayop sa akong paghukom. Tungod kay kun masayop ako, ako ra usab ang mag-antos sa linugdangan unya niini.”

“Hisabtan ko ikaw, sister Veronica,” matud ni Rey. -- Sumpayan pa