Isla Paraiso

Gula 97

Unya namatikdan ni sister Veronica nga mikalit kaligdong ang panagway ni Rey. Tul-id kini nga mitan-aw kaniya.

“Nalipay ko nga migahin ka og panahon alang kanako, sister Veronica,” nagkanayon si Rey. “Apan mas malipay gayud ako kun dawaton mo na ang akong gugma.” Wala makatubag si sister Veronica. Miduko siya sa atubangan ni Rey.

Ang bagtok nga kahilom mipataliwala kanila ni sister Veronica ug Rey. Ang lalaki ingon sa mahinamon nga nagpaabot nga mamulong ang madre. Apan si sister Veronica nagpaulipon sa kahilom.

Wala karon makasabot si sister Veronica sa iyang kaugalingon. Nakaumol na siya’g hukom nga sugton na niya si Rey. Apan karon ingon sa naglisod siya sa pagpadayag niini ngadto sa lalaki. Nagpanagana siya. Mora ba’g dunay kamot nga dili makita nga mihawid sa iyang dila. Dili niya malitok ang buot niyang isulti. Dili niya mabungat ang mga pulong nga nahan-ay na untang daan sa iyang kaisipan.

“Hangtod ba karon, sister Veronica,” namulong si Rey nga maoy nakagisi sa kahilom, “wala pa gihapoy paglaom ang gugma ko kanimo?”

“K-kun dawaton ko ang imong gugma, Rey,” ni sister Veronica pa, “dili kaha musamot kabug-at ang sagubagon ko unyang mga problema?” -- Sumpayan pa