Ready, ready smile

Mitan-aw ko sa akong relo alas dos y media na sa hapon. Misaad man gud ko ni Kieth nga mo kodak sa iyang Papa didto sa sementeryo nga maoy gusto sa iyang Mama Mesya. Gusto ni Mama Mesya niya nga ipa klos-ap gyud ang nawong sa iyang bana nga si Tinong kay mao ray litrato nga iyang mahandom.

Ang tinuod dili na gyud unta ko gusto mokodak og patay kay mitagam nako. Huna hunaa lang kodak didto, kodak diri, ug kun dili ka katuman sa ilang gusto nga isitar masuko, unya inig hatud sa litrato dili kuhaon ang tanan maayo lang dunay kuhaon usa o duha, kay unsaon man kuno nang litrato sa patay makasamot man lang sa kaguol sa hingtungdan.

Lain pay katarungan nga dili nako ganahan mokodak og patay, kana tungod sa kaapiki sa lugar sa sementeryo. Pun-an pa sa mga stand sa lungon nga tag as ra, mabawo ta’g tingko sa atong  tiil aron lang maka pokos sa nawong sa minatay. Mao nga kun duna may mokontak nako nga pakodakon og patay akong balibaran. Kun dili pa lang tungod sa kasuod namo aning namatay nga si Tinong ug sa iyang asawa nga si Mesya, aw dili gyud mahitabo nga mokodak ko.

Human ko makailis sa akong sapot milakaw ko paingon sa simbahan kay duol ra man kini sa among balay. Igo gyud kong nakaabot sa simbahan mao usab ang paggawas sa minatay aron dad-on na sa sementeryo. Misunod na lang ko sa porlon paingon sa sementeryo.

Didto sa sementeryo, human sa mubo nga pangadye ni nang Rosa, misitar dayon si Boning igsoon ni Tinong nga klos-apan na ang nawong ni Tinong, kay isulod na sa nitso ang lungon. Naglisod ko og pukos kay apiki kaayo ang lugar. Gawas pa taas ra ang stand sa lungon ug normal ra ang lente sa akong kamera.

Apurado kaayo si Boning, “Sige na Siong kodaki ang minatay kay isulod na ang lungon sa nitso.”

Naratol ko kay apurado kaayo si Boning. Sa dihang nakatungtong ko og gamay’ng bato, gipukos dayon nako ang nawong sa namatay. Ug tungod sa akong karatol misitar ko sa namatay, “Ready, ready smile.”

Si Boning ang igsoon sa namatay wa kapugong mibuhihi og katawa, bisan  kadtong nag-alirong sa lungon nga naghilak mikatawa, apil na si Mesya nga asawa ni Tinong, kay naa ba kunoy patay nga mo-smile.

Nahimo tong pagya, “Ready, ready smile”! Ug bisan og dugay na kadtong nahitabo, inig kakita namo ni Boning, mosinggit siyang motagad nako, “Ready, ready smile.” (Katapusan)