Ang itik ni Making ungo

Dihang miadto si Making sa balay sa iyang higala nga si Hibok hilabihan ang kahinangop niini kay karon pa gyud mahitabo nga gibisitahan siya ni Making. Suod sila apan wala pa gyud makaanha si Making sa ilang balay sukad masukad ug karon pa gyud.

“Matay, Bay Making, imo man kong gipakuratan. Ikaw kaha ni?” ni Hibok pa nga nangumedya.

“Ako ni, Bay Hibok, uy,” daling tubag ni Making. Kini si Hibok anak sa magtiayong Luncio-Mitang, ang gidungogdungog kaniadto nga gipatakdan kuno pagka-ungo. Mao bitaw nga wala nay mamalit sa ilang karenderya og mga sud-an kay nahadlok sa tabitabi. Ang inahan ni Making nga si Yolanda mipabugnaw sa iyang anak nga dili na makigsuod kay lagi ungo ang kaliwat ug kuyaw kaayo kun ayonan si Making ug unya patakdan.

Ungo gud tawon, Ma, dili na ungo sila si Hibok, uy. Nia ay, adtong pista sa lungsod sa Ilagan nanulod mi sa simbahan ug nakita nako nga miluhod si Hibok,” ni Making pa.

“Aw, mosimba man na sila ba, kanang mga ungo.”

“Way ungo mosimba, Ma, uy, kay mahadlok na sila’g bendetta.”

“Mosimba lagi na sila.”

“Aw, ikaw gud, basta para nako dili gyud na ungo sila si Hibok, Ma.”

Karon ning pag-anhia ni Making sa ilang Hibok. Gilutoan ni Hibok si Making og lamiang pagkaon. Dihay sinabaw’ng linat-anang manok ug diha poy bipstik nga baka nga nindot kaayong pagkaluto. Ug aron gyud nindot ang ilang panagsawo ron ning udtoha may gipadayag si Hibok.

“Bay Making, hatagan tika’g itik. Daghan man kaayo mi’g itik dinhi. Usa lang gud, aron dili  hasol kay kusog ra ba kaayo na sila mangakha’g lapok sa punggasan o di ba lapok sa kanal, unsa man, okey ka?” ni Hibok pa.

“Okey, basta, ikaw,” daling tubag ni Making.

Tuod duna na sila’y itik  si Making. Ug sa paniid ni Making buotan kaayo nga midako ang itik. Basta naa si Making sa balay moduol dayon ang itik kaniya ug magtuhiktuhik og hinay sa iyang tiil.

Paglabay sa tulo ka bulan, may gikahibudngan si Making kay sukad namalhi’g puyo sila si Hibok ngadto sa isla, ang itik mosuroy man panahon sa gabii. Dihay kausa, halawom nang gabii, nga nakita ni Making ang iyang itik nga mikalit lang pagtugdon sa may sanga sa ilang kalatsutsi sa tugkaran ug mitingog nga nagkanayon, “Making...Makinggg...Makinggg... ugma ini’g takdol sa bulan, mokuyog ka na nako kay ako’y mag-una aron mangabat taaa....aharaaakkk...aharaaakkk..”

“Uy, mitingog ang akong itik, kamao kining mosulti, tinuod kaha ning akong nabati,” ni Making pa sa kaugalingon. Unya, “hoy itik, kamao man lagi kang mosulti!”

“Oooo...ahaaakkk...

ahakkk... kay ako ang itik sa mga mangtas nga ungooo, ahaakkk ug ikaw, Making, natakdan na sa pagka-ungo ug ugmang adlawa, mahimo ka nang wakwakkk...” kusog ang tingog sa itik.

Tuod pagka-ugma sa gabii sa pagsubang gyud sa takdol nga buwan kalit lang migaan ang lawas ni Making ug gipangtugkan siya’g mga balhibo ug nahimo siyang usa ka iro ug dayon miuwang siya, “awooooo...awoooo!!! Ug misunod sad pag-ayagak ang itik nga nagkanayon, “ahaaakkk...!!! ahaaraakkk...tana, Making...mangabat na taaa...ug ako’y mag-una nimooo....”

Ug dinhi sa sityo Balit-Kasko daghan nang makadungog sa tingog sa wakwak nga magbahisbahis apan wala pa gyu’y gibalbal nga mga lumolupyo kay alang kang Making dili ug dili gyud siya mangunay og silingan. (Kataposan)