Two Lovers

Gula 6

Paglabay sa pipila ka adlaw, gisugot na g’yud ni Rosemarie si Virgilio. Pwerteng lipaya ni Virgilio nga sa kataposan naangkon na niya ang gugma sa babaye nga dugay na niya nga gimahal.

“Ikaw ang hinungdan Rose nga nagpabilin ako nga ulitawo hangtod karon,” giingnan ni Virgilio si Rosemarie. Bulgar na kaayo sa ilang opisina ang relasyon sa duha.

Gani human sa ilang trabaho, magkuyog na g’yud sila si Virgilio ug kanunay kini nga ihatud niya si Rose sa iyang gipuy-an. Miabot ang adlaw’ng natawhan ni Virgilio.

Wala malilong sa mga kawani sa kompaniya ang maong okasyon. Naglibog si Rose kun unsay iyang ihatag nga gift sa iyang boyfriend nga mao usab ang iyang general manager.

“Unsa kaha ang akong gift nimo no? Kun may ihatag ko baratohon ra g’yud tingali kay pobre man tawon ning imong girlfriend,” giingnan ni Rosemarie si Virgilio.

Gitutokan si Rose ni Virgilio. “Ang labing nindot nako nga gift nga pangayoon kanimo nga magtipon na lang ta pagpuyo Rose. Wala ko’y kauban sa balay nga akong giabangan. Total nag-abang ka ra man ‘sab sa imong gipuy-an.”

Wala dayon makatingog si Rose, nakalitan siya sa iyang nadungog gikan kang Virgilio. Nahuna-huna niya nga husto si Virgilio, nganong dili man tuod sila magtipon na lang nga patay na man ang iyang bana nga si Jeffrey.

Pagka-ugma, birthday na g’yud ni Virgilio. Buntag sayo pagmata g’yud ni Rosemarie, giteksan dayon niya ang iyang manager-boyfriend ug gi-greet og happy birthday.

Wala madugay, mitawag kaniya si Virgilio sa iyang selpon. “Salamat kaayo Rose, abi nako og malimot ka nga birthday nako karon. Wala ka ba ‘sab malimot sa akong gisugyot kanimo nga magpuyo na lang ta?”

Nakapahiyom si Rosemarie. Ang tinuod nakahukom na siya nga tangdoon si Virgilio sa iyang tinguha nga magtipon na sila’ng duha. “Sigi, approve nako ang imong sugyot Vir,” kalma nga tingog ni Rose.

Napasinggit si Virgilio sa kalipay. Nagkataw-anay silang duha bisan diha ra sila magsultihanay sa selpon. “Birthday leave ko karon Rose. Ayaw na lang ‘sab pag-report sa imong trabaho kay hakuton nato ang inyong kagamitan diri sa akong gipuy-an,” matud ni Virgilio.

Miuyon na lang si Rosemarie ug wala na siya mo-duty nianang adlawa. Gihakot nila ang kabtangan ni Rosemarie didto sa iyang gipuy-an ug gibalhin sa balay nga giestahan ni Virgilio.

“Gikan karon, ikaw na ang hara dinhi sa akong gipuy-an Rose,” matud ni Virgilio nga miagbay sa iyang gipangga. Pagka-gabii, tam-is kaayo nila nga gisaw-an ang pagmahalay. - Sumpayan