Makapaabot ang gugma

Pebrero 14. Sulod sa katloan ka gutlo nga romansa nilang Charlie ug Aida ilawom sa kalibonan ubos sa sumasalop nga adlaw, dili na makapugong si Charlie. Gusto na niya nga pusgayon ang pagkabirhin sa iyang uyab. Gilabnot niya ang panty sa dalaga ilawom sa bistida niya. Aron mahubo na kini. Namugong si Aida. Gigunitan niya ang toong kamot sa ulitawo aron di mahinayon og tangtang ang taming sa iyang hiyas.

“Ayaw, Charl!” sa dalaga. Naghangos. Nag ulyap-ulyap ang dughan. Nahunong ilang romansa.

“Di pa gyud ka?! Nga nagsige na man gani ka’g piyong, hangos ug agulo” sa ulitawo. Nadismayo.

Kompiyansa si Charlie nga way laing tawo makakita nila. Kay libon kaayo ning dapita sa bungtod ilang abutanan. May mga gagmay’ng kahoy sa palibot sama sa biyatilis, siyapo ug tulogtulog. Di mabuling ilang mga sapot kay gihapinan og balili ang yuta. Sa ibabaw nila, di kalusot ang hayag sa adlaw kay gikatayan og mga cadena de amor, utot utot ug uban pang balangon ang ibabaw sa mga sanga sa mugbong kahoy.

“Gilamian man gyud kos imong mga halok ug gakos. Labi na sa kalihokan sa imong kamot” nakapahiyom si Aida.

“Sige lang tang sugod? Ato ning humnon!” ni Charlie. Nangugat.

“Kana na lang butanga ang wa nako nahatag nimo. Imo nang nakita ug nahikap ang kinatibuk-an sa akong lawas.

“Unya? Nganong di pa man gyud ka?”

“Duna pa koy nahibiling gugma sa akong kaugalingon.”

“Unsay buot nimong ipasabot?”

“Nobenta porsiyento sa mga babaye nga nitahan na sa tanan sa lalaki, dili na pangasaw-on. Kasagaran, mahimo nang single mom. Gusto ko nga ang akong pagkaputli, itagana nako sa mamahimo nakong bana”.

“Wa pa diay ka nitoo nga ikaw akong pangasaw-on?”

“Layo ug dugay pa kaayo na. Nia pa god ta sa ikaupat nga tuig sa hayskul. Puro pa estudyante nagsalig sa mga ginikanan. Dili nato sundon ang sayop sa uban. Namabdos og sayo. Naminyo og sayo. Dili preparado. Way kalipay sa kaminyoon”.

“Maria Clara ka man. Moderno na ta ron. Di na uso ang virgin!”

“Aron makatuo ko nimo, ipailaila ko ug labing minus lima ka dalaga, nga moingon sila sa akong atubangan nga di na sila virgin.”

“Mag unsa na man lang ta ron?”

“Mamauli na ta. Basi’g gipangita na ta’s ato. Mamukwas pa ko’g hinayhay. Ikaw manghipos pas mga kabaw ug bakang gitugway”.

“Ah maayo pa magbuwag ta!” ni Charlie. Nitindog. Nauknol si Aida. Nakahinuktok og kadiyot nga nagyaka.

“Ok ra ko. Pero sultihan tika daan. Ikaw lang ang lalaki para nako. Ang gugma makahuwat. Kun di ka kahuwat, wa kay gugma”.

“Ah, bahala ka diha. Buwag na ta!”

“Kini lang akong ipasalig nimo. Praktikal ko nga pagkababaye. Kun di ko kakita nga duna na kay laing uyab, di una ko manguyab og lain. Kun maminyo ka og lain, una pa sab ko makigminyo og lain” ni Aida. Nitindog. Namulang mga mata. Nanglugmaw ang mga luha. Nidagan palayo sa ilang nahimutangan.

“Komedya ra tong ako oy! ni Charlie. Nihana og gukod sa dalaga. Nagmahay sa iyang gisulti. Ug nihinay na la’g lugsong subay sa giagian ni Aida. (Katapusan)