Tawag sa lungsod

Apan kalit lang usab nga nahanaw  ang iyang gibating kakulba, sa dihang nailhan niya ang nanganaog gikan sa maong sakyanan. Pulospulos ra

diay kini taga ila ug mga kaila gani kaayo niya. Ug ang nangulo sa maong pundok, mao gayud si Padre Ode. Usa ka pari nga atua madestino sa laing parokya. Apan lumad gayud nga taga ila ni Jerry.

Uban sa maong grupo mao usab ang pipila ka mga pangulo sa nagkalainlaing mga kapunongan diha sa lungsod ug ingon usab ang presidente sa mga batan-on. Nga usa sa mga kadugo nila ni Jerry.

“Nagmilagro man mo?” Maoy timbaya ni Jerry sa pundok sa dihang nahiabot na siya sa ilang may pergola, diin managtapok ang ilang mga bisita. Nga nakig-estorya sa iyang asawa niadtong tungora.

“May tuyo mi kanimo Jer,” si Padre Ode maoy mitubag.

“Unsa man unta?” Nakapangutana si Jerry. Wala man gud siya’y ideya, kun unsay tuyo ning ilang mga bisita, nga gipangulohan ni Padre Ode.

“Ania lagi mi Jer, aron hangyuon ka, nga modagan ka unta sa pagka mayor sa atong lungsod ning umaabot nga piniliay. Natapos naman gud ang termino sa atong kasamtangang mayor,” si Iyo Doming nga maoy presidente sa pundok sa mga mananagat maoy mitubag.

“Ang buot ninyong ipasabot, nga ang akong bana maoy pakontrahon ninyo kang Atty. Makisom. Nga nagtinguha usab nga mahimong mayor sa atong lungsod?” Mitimang na usab ang asawa ni Jerry.

Daw wala man gud siya’y pagsalig sa iyang bana nga maoy makigkontra unya kang Atty. Makisom. Kay gawas nga abogado ang mahimong kontra unya ni Jerry, kuwartahan pa gayod. Gani, mao kini ang kasamtangang bise mayor diha sa ilang lungsod. Samtang si Jerry, wala gani makaagi bisan pagka kapitan nalang sa barangay.

“Ngano man diay, wala ka diay mosalig sa imong bana, Nang,” misagbat usab ang usa ka batan-on. Nga kuyog sa grupo.

“Si Jerry man gud Inse, maoy among natan-aw nga angayan kaayo sa maong posisyon. Nga angay nga ipuli sa atong kasamtangang mayor. Nga dili na molansar, kay natapos naman ang iyang termino,” gikan na usab kang Padre Ode.

Dako man gud siya’g pagsalig sa katakos ni Jerry nga mahimong mayor. Kay gawas nga utokan kini, tarong usab nga pagkatawo.

“Unya, asa man unya mi’g kuwarta nga gastuhon unya sa umaabot nga eleksyon?” Nakapadayag ra gayud ang asawa ni Jerry sa tinuod niyang kabalaka.

“Kuwarta? Dili ang kuwarta maoy makapadaog unya kang Jerry. Kun dili ang pagpanginahanglan unya sa mga tawo kaniya,” gikan gihapon kang Padre Ode.

Dungan ang pagtunol sa porma sa “Certificate of Candidacy’ ngadto kang Jerry.

“Daghan kaayong salamat sa inyong dakong pagsalig sa akong katakos. Dili ko kamo pakyason, kun magmadaugon ako,” kahilakon si Jerry nga namulong atubang sa mga tawo nga nag-alirong kaniya. Mga tawo nga maoy nag-awhag kaniya, aron siya molansar pagka mayor sa ilang lungsod. (Kataposan)