Valentine’s date

Puro sila guwapo, macho, buotan, intelehente, responsable ug stable na sa ilang mga trabaho. Husband material gyud silang duha. Si Allan usa ka Civil Engineer. Si Danny usa ka CPA. Ug dagko sila’g kita kay gawas sa ilang mga propesyon, nagdumala og dagkong mga negosyo.

Sa laing bahin, si Mona, dili sab nila ikaminus. Kay gawas nga propesyonal, stable na sab og trabaho. Usa ka Interior Designer si Mona. Number 9 sa board exams. Ug number 5 sa lista sa Ten Outstanding Designers in the Philippines. Dili bastabasta nga pagkababaye si Mona. Mao nga ang duha ka ulitawo, puro hugot nga naninguha sa dalaga. Naglisod si Mona og pili nilang duha, kay dili sila lisod higugmaon. Usahay makaingon si Mona, nga kun mahimo pa lang lumpongon silang duha, silang duha na lang. Apan ang iyang mga ginikanan ug ang moralidad sa atong katilingban ang nagpugong kaniya, nga usa ra gyuy pilion sa duha ka nagribal. Gidili ang polyamory.

“Mobisita ko’s inyo, Lan, Dan. Mohuwam ko og libro gikan sa mga koleksyon sa inyong mga nobela ug paperbacks. Ako ray mopili gikan sa inyong bookshelves. Unya, ini’g uli nako sa libro, isukip na nako ang akong desisyon pinaagi sa sulat, kun kinsa ninyong duha ang akong sugton” ni Mona ngadto’s duha ka ulitawo nga nagtupad og lingkod sa sopa atbang sa dalaga sulod sa ilang sala.

“Nia sulod sa sobre ang petsa ug oras sa akong pagbisita sa inyo. Ug atol gyud sa Valentine’s Day nga madawat ninyo akong hukom” ni Mona.

Gitunolan og tagsa ka sobre ang duha ulitawo. Nagdungan sila og panganaug ning hapon nga sumasalop na ang adlaw.

Nasayod na si Mona kun kinsay pilion sa duha. Ang lalaki nga dunay malomo og kasingkasing. Nangunsulta siya sa iyang lola Almira.

“Imong sulayan sa duha kun kinsa ang dunay malomo’g kasingkasing. Maoy imong sugton” sa iyang lola, usa ka hapon nga iyang gikahinabi.

Pebrero 6, alas 4 sa hapon, giablihan si Mona sa gate sa balay ni Allan. Naglubog, ug nagbabag ang iro ni Allan sa pultahan sa main door sa balay.

“Tse! Tse! Tse!” ni Allan. Dugay’ng nilihok ang iro. Gipatiran ni Allan. “Awwrrk!” nitiyabaw ang iro. Nidagan.

“Pebrero 7, alas 4 sa hapon, giablihan si Mona sa gate sa balay ni Danny. Nagbabag ang iro ni Danny sa pultahan. Gipunit ni Danny. Gikugos. Gihapuhap. Gihatagan og pagkaon.

Ug nahinumdum si Mona sa dugang pulong sa iyang lola.

“Masayran nimo ang tawong malomo og kasingkasing sa pagtratar niya sa iyang mga hayopan.”

Nasayod na siya kun kinsa sa duha ka ulitawo ang mahimo niyang Valentine’s Date. (Kataposan)