Pagbati sa Pebrero

Wala’y kadasig si Nicole sa sulod sa opisina. Nagtuk-ong siya sa iyang office table. Pag-abot sa lunch time, wala siya magunok. Giduol siya ni Shiela nga suod niyang higala.

“Unsa, dili ka mukaon, Nicole? Tana, uy. Mangadto na ta sa canteen.”

“Wala ko’y ganang mukaon, Shiela.”

Nanghupaw si Shiela. Nakasabot siya sa gibati ni Nicole.

“Si Ed ang imong gihunahuna, no?”

“Kinsa pa man diay? Maoy iyang gisaad nako nga sa unang semana sa Pebrero mopauli siya aron mamalaye nako. Unsa na man rong adlawa? Lima ka adlaw na lang Valentine’s Day na?”

“Gisultihan ko na ikaw, Nicole nga lisod ang long distance relationship. Pagkalayo sa Canada? Dili ka angay nga maglaom kang Ed.” “Nanumpa siya nako nga pakaslan gyud ko niya, Shiela.

“Oo lagi.Pero ayaw kalimot nga doktor si Ed sa Canada. Tua na siya didto magtrabaho. Daghang guwapa didto, uy.”

Pagpauli ni Nicole nianang pagkahapon, mikuyog kaniya si Loyde nga kauban niya sa opisina.

“Gisultihan ko ni Shiela kun nganong wala kay ganang maniudto ganina, Nicole. Wala ko pabulagi nimo si Ed. Nagpahinumdom lang ko nimo nga nia ko, andam kanunay sa pagpakasal nimo.”

Usa ka tuig nang nangulitawo si Loyde kang Nicole. Apan wala siya panumbalinga ni Nicole kay hinigugma man niya si Ed.

“Nagplano na ming magpakasal si Ed. Naghuwat ko sa iyang pagpauli, Loyde.”

“Well, ikalipay ko kun mahitabo na, Nicole. Kalipay ko ang imong kalipay.”

Usa ka gabii, mitawag si Ed kang Nicole sa selpon. Nahugno, sa paminaw ni Nicole, ang iyang kalibotan sa gipahibalo kaniya sa iyang hinigugma.

“Duna na koy girlfriend diri sa  Canada, Nicole. Sabta ko. Naglisod ko pag-adjust sa atong sitwasyon.”

“E-Ed!” Mao ra kini ang nasulti ni Nicole. Gipasagdan niya ang iyang mga luha nga naglumba sa pagdagayday sa iyang mga mata.

Milabay ang lima ka adlaw. Malipayon si Nicole. Valentine’s Day. Nabatyagan niya ang pagbati sa Pebrero. Nagpitik ang kasingkasing sa Pebrero alang kaniya.

Si Loyde ang iyang kauban karon sa candle light dinner. Nagpahiyomay sila. Nasabtan kaayo ni Nicole ang iyang kapalaran sa gugma. Si Loyde ang alang kaniya, dili si Ed. (Katapusan)