Salamat sa kawatan

Gula 5

Milabay ang mga adlaw nga wala sila magkakita si Femarie ug Lando, apan walay puas ang pagbayloay nila og text messages. Nakapasuod kini kaayo kanila’ng duha.

Nahimong batasan ni Lando nga mata’g buntag g’yud sa iyang pagmata, padad-an dayon niya og morning greetings si Femarie. Kun hapit na ang ting-kaon, pahinumdoman ni Lando si Fem nga  mokaon dayon.

Gani diha’y higayon nga giteksan si Lando ni Femarie. “Ka caring nimo uy. Mao ra ba na ang sagad ma in-love ang girl.” Wala dayon sakyi ni Lando ang mao nga text message gikan sa dalaga apan iya kini nga gikahimuot pag-ayo.

Gipadayon ni Lando ang naandan na niya nga pagpakabana kang Femarie. Diha’y higayon nga nanugo siya og higala ug gipahatdan niya’g foods si Fem didto sa botique nga iyang gitrabahoan.

Wala g’yud mosipyat si Lando. Taud-taud nakadawat siya’g text gikan ni Fem. “Grabe! Nagsugod na g’yud ko’g in-love sa nag-care nako! Joke lang.”

Gi-reply ni Lando ang text si Fem. “Nindot unta kun dili lang joke Fem. Malipay g’yud kaayo ko.” Wala tubaga ni Femarie ang mao nga message gikan ni Lando.

Milabay ang laing mga adlaw, nahimong mga semana. Gimingaw na g’yud kaayo si Lando sa dalaga. Gusto na unta siya nga makigkita kay sayon ra man ang pag-adto sa iyang gitrabahoan nga botique.

Apan giantus ni Lando ang kamingaw. Gusto niya nga sukdon kun bation ba usab og kamingaw kaniya si Fem. May nahuna-hunaan nga paagi si Lando.

Wala na g’yud siya mo-text pa kang Fem. Gihunong na niya ang pagpadala’g mga morning greetings bisan og sakit unta kaayo kini sa iyang kabubot-on.

May kabalaka nga mitumaw sa iyang kaisipan nga tingali’g mosangpot hinoon kini nga magkalagyo na sila si Femarie. Milanat na og usa ka semana nga wala na sila’y kumunikasyon.

Usa ka buntag, si Femarie na maoy mi-text kang Lando. Nangumusta kini kaniya ug nagsusi nganong wala na kini mo-text sa milabay’ng mga adlaw.

Ang labing nakapaikag kang Lando mao ang ikaduha nga text message ni Femarie. “Miss na g’yud nako ang kanunay nimo nga morning greetings ug pagpahinumdom nga dili ko maglangan-langan sa pagkaon.”

Nasuta ni Lando nga husto diay g’yud ang giingon sa iyang higala nga si Elly Bolonos nga “Usahay ang kabililhon sa usa ka butang, anha mo ra mabatyagi kun kini halayo na sa imong mga bukton.”

Apan wala maputol ang ilang panagsuod ni Femarie. Gusto lang ni Lando nga sugdon kun mobati ba og kamingaw ang dalaga kaniya kun dili sila magkakontakay. - Sumpayan