Salamat sa kawatan - Gula 4

Nananghid si Femarie sa iyang ig-agaw nga kauban sa tindahan nga molakaw siya’g kadiyot. “Ako usa ni’ng bangkahan si Lando kay mao ra ba kini ang nakatabang nga wala makawat ang akong selpon,” giingnan ni Femarie ang iyang kauban sa tindahan.

Nanulod sila si Lando ug Femarie sa duol nga kan-anan diha ra gihapon sa mall. Sa tanto nila nga pagsultihanay, nalibkas ang baba ni Lando ug iyang natug-an kang Femarie nga nagtungha pa siya sa kurso nga Criminology.

“Hala, kanindot kun makahuman ka na sa imong kurso Lan unya mahimong polis, may suod na g’yud ko nga amigo nga usa ka polis,” matud ni Femarie nga nagngisi.

“Gusto ka diay makig-amigo og polis? Maayo pa’g gihatagan na lang nako sa imong contact numbers kadtong polis sa Waterfront,” nagkatawa si Lando nga mitutok ni Femarie.

Mikatawa na lang ‘sab si Femarie. “Dili ‘sab ko adto niya uy. Ang sama nimo nga amigo maoy akong gusto nga polis nga mahigala,” dugang pamahayag ni Femarie.

Nakahuna-huna dayon si Lando nga sakyan ang mao nga sitwasyon. “Gusto ka ba nga polis ang mahimo mo’ng bana Fem?” matud ni Lando nga mahinamong nagpaabot sa reaksyon sa dalaga.

“Depende. Kun maoy akong kapalaran nga polis ang akong mabana, labi na’g buotan, nganong dili man,” ni Femarie pa.

Nahunong ang ilang panagsultihanay kay nagsingabot na ang waiter nga nagdala sa gi-order nila nga pagkaon. Nangaon sila si Femarie ug Lando. Taud-taud si Femarie maoy mibayad sa ilang pagkaon bisan og wala unta mosugot ang ulitawo.

“Gibangkahan tika Lan agi’g pasalamat sa daku nimo nga natabang nako,” giingnan sa dalaga si Lando. Gipasabot ni Femarie si Lando nga dili siya kaayo makadugay sa pakig-uban sa ulitawo kay nagbantay sila sa botique.

Giingnan sa dalaga si Lando nga manuroy lang unya sila pag-usab kung wala siya’y trabaho. “Akong paabuton ang mao nga higayon Fem. Ikalipay g’yud nako pag-ayo kun magkauban kita pag-usab,” ni Lando pa.

Wala na magdugay pa si Lando sa pagsuroy sa mall. Mipauli siya nga wala pa manirado ang tindahan. Mideritso na siya’g pahuway ug samtang nagbuy-od sa iyang higdaanan, gihanduraw niya ang ilang panag-uban ni Femarie.

Gipiyong ni Lando ang iyang mga mata apan tulin kaayo nga naglatagaw ang iyang kaisipan. Ingon sa gilantaw na niya ang panghitabo kun magkauban na usab sila pag-usab si Femarie.

Nahukman ni Lando nga panguyaban na gayud niya ang dalaga sa sunod nila nga panagkuyog. Daygan na niya kini sa iyang gibati. Nakabatyag na si Lando nga ang iyang kasing-kasing mipitik na og gugma sa dalaga. - Sumpayan