Salamat sa kawatan

Gula 2

Didto sa Waterfront police station nagkaila-ila sila si Lando ug Femarie, ang babaye nga gikawatan unta og selpon samtang nagkaon apan nakit-an kini ni Lando.

“Salamat kaayo Lan ha? Sus! May sentimental value ra ba g'yud na nga selpon para nako kay gipalit ko kana gikan sa una nako nga sweldo,” matud ni Femarie.

 Sa imbistigasyon sa kapolisan, walay nahimo ang dinakpan gawas sa pag-angkon nga iyang gikawat ang selpon. Wala siya makapanghimakak kay diha man g'yud nakuha sa iyang bulsa ang mao nga butang.

Pwerte nga nakapangayo'g pasaylo sa kawatan ngadto kang Femarie aron dili lang siya pasakaan og kaso. Wala kini mauwaw nga mitiyabaw atubangan ni Femarie ug sa imbistigador sa kapolisan.

Ingon sa nadutlan og kaluoy si Femarie mao nga mihukom na lang siya nga pasayloon ang kawatan ug dili na lang ikiha. "Pasayloon na lang nako ni siya Sir. Dili na lang ko mokiha," giingnan ni Femarie ang polis.

Bisan giunsa sa polis pagkumbinsir si Femarie nga ikiha gayud ang kawatan aron motagam apan wala usba sa dalaga ang iyang hukom. Wala’y nahimo ang polis gawas sa paglingo-lingo.

"Salamat g'yud kaayo ma'am. Isaad nako nimo nga dili na g'yud ko mousab. Dili g'yud ko kawatan apan naibog lang ko sa nindot kaayo nimo nga selpon," matud sa kawatan.

Nagbayloay og contact numbers sila si Lando ug Femarie sa wala pa sila magbuwag-buwag. Gibuhian nila ang mga matam-is nga pahiyom sa dayon nila nga panagbuwag-buwag.

"Mo-text unya ko nimo Fem ha?" giingnan ni Lando ang dalaga nga bag-o niyang nahigala. "No problem Lan. Ikaw pa?" dali kaayo nga nakatubag si Femarie inubanan sa tam-is kaayo nga pahiyom.

Gisundan paglantaw ni Lando ang bayhon sa dalaga sa wala pa kini makasakay sa taksi uban sa iyang mga barkada. Giduol si Lando sa polis nga nag-imbistigar kanila.

"Gwapa 'sab to'ng biktima no? Wala hinuon ko makapangayo'g contact number niya da. Naa kay contact adtong victim?" gisukna si Lando sa polis.

Nahukman ni Lando nga dili hatagan og contact numbers ang polis. Nakabantay si Lando nga naibog ang polis kang Femarie. Karon pa lang, nakabatyag na si Lando nga may pagbati siya ngadto ni Femarie.

Pagbiya ni Lando sa Waterfront police station iyang giteksan si Femarie ug gitug-anan nga gusto'ng mangayo'g number niya ang polis.

"Unya imong gihatagan?" reply ni Femarie kang Lando. "Wala lang kay kuyaw kaayo nga polis ang akong makaribal," matud ni Lando nga daw nagsugod na pagpalabtik sa dalaga. - Sumpayan