Isla Paraiso - Gula 77

“Wala’y kalinaw ang akong hunahuna, sister Veronica,” pulong ni Rey, “tungod kay hangtod karon wala mo pa gayod hatagi bisan diyotay na lang nga paglaom ang gugma ko kanimo.”

“Unta hisabtan mo usab, Rey,” ni sister Veronica pa nga mihana pagkurog ang tingog, daw kahilakon, “nga managlahi ang dalan nga atong gisubay.”

“Ang imong pagka-madre dili babag sa paghigugma ko kanimo,” ni Rey pa.

“Apan mao kini ang dakong babag kun nganong dili ko ikaw mahimong higugmaon.”

“Sa ato pa, kun dili ka pa madre karon, hayan gihigugma mo na ako?”

“U-unsa?”

“Matud mo, ang imong pagka-madre maoy babag kun nganong dili mahimong higugmaon mo ako.”

“A-ang buot kong ipasabot...”

“Please, sister Veronica... ayaw bakwia ang imong gisulti. Hatagi ko’g diyotay’ng paglaom sa pagpakabuhi.”

Kahilom.

“Gimahal ko ikaw, sister Veronica. Dili ko ikapasalig nga ikahatag ko kanimo ang maayong kaugmaon, apan paningkamotan ko nga malipay ka kun imo akong higugmaon. Kun duna may pulong mas bug-at pa sa pulong gugma mao kana ang gibati ko kanimo, nagkanayon si Rey. -- Sumpayan pa