Isla Paraiso - Gula 70

“Kun ikaw pa sa akong dapit, sister Veronica,” nagkanayon si Rey, “imo untang masinait kun unsa kapait ang akong kahimtang ug unsa kabug-at ang akong pag-antos tungod sa gugma ko kanimo.”

“Ug unsa may gusto mo nga buhaton ko?”

“Simple lang, sister Veronica. Wala ako magpaabot nga gantihan mo’g dakong kantidad ang akong mga pag-antos. Igo na kanako nga higugmaon mo ako tugbang sa naghingapin kong pagmahal kanimo.”

“Apan nasayod ka nga dili ko kana mahimo, Rey.”

“Ug nganong dili man mahimo, sister?” Ikaw ang nagdala sa imong kaugalingon. Ikaw ang magbuot sa bisan unsang desisyon nga imong himuon. Please, sister Veronica. Listen to my heart. And listen to your heart too.”

Miduko si sister Veronica. Karon ingon sa wala siya makasabot sa iyang kaugalingon. Ingon sa inanay nga gituhop sa kaluoy ang iyang kasingkasing alang kang Rey. Nahunahuna niya nga dili tiaw ang pag-antos ug pagpailob ni Rey sa pagpangulitawo niini kaniya. Hilabihan ka taas na sa kutay sa panahon sa paghulat niini nga iyang higugmaon.

Samtang naghunahuna niini, ingon sa dihay bahin sa balatian ni sister Veronica nga nahumok. Alang kaniya, igo na ang pag-antos ni Rey nga nahigugma kini kaniya. Apan dili niya mahimong higugmaon ang lalaki. Alang kaniya, ang Diyos lamang ang iyang higugmaon. Oo, ang Diyos na lamang. -- Sumpayan pa