Call Center Agent

Gula 5

Gitug-anan ni Nelson si Gemma nga mibati gayud siya og dili matukob nga kahinam sa mata’g higayon nga mabag-id ang iyang atubangan ngadto sa sampot sa dalaga samtang nagtan-aw sila kaganina sa mga contingents sa Sinulog Grand parade.

“Nakabantay ko uy, gahi kaayo,” nagngisi si Gemma nga mitutok kang Nelson. Mora’g nauwaw si Nelson kay gilupig siya’s harong ni Gemma. “Pwerte ‘sab nimo nga nagpagana kaganina uy. Gipasagdan ra tika,” dugang pa sa dalaga.

Nakahukom si Nelson nga mosukol pakigkomedyahay kang Gemma. Nahibulong siya nganong ingon niini ang batasan sa dalaga nga molahutay og komedyahay kabahin niini nga unta usa man siya ka babaye.

“Bisan kinsa na man tingali nga lalaki uy, mobati g’yud sa akong gibati kaganina kay gwapa gud nga babaye ang anaa sa akong atubangan,” matud ni Nelson. “Kamong mga babaye mobati ba ‘sab og kahinam kun ingon niadto Gem?” pasupot nga pangutana ni Nelson.

Abtik kaayo nga nakangisi si Gemma ug miangkon nga susama ra usab sa mga lalaki nga ang mga babaye mobati ‘sab og kahinam basta makagusto sila sa mga lalaki. “Pero’g wala ka makagusto sa tawo, dili ka g’yud bation og kahinam, masuko pa,” matud ni Gemma.

Niining bahina nakahuna-huna og maayo nga pangutana si Nelson ngadto sa dalaga. “Unya, kay wa ka man masuko kaganina Gem, nagpasabot ba kini nga nakagusto ka ra sa akong gihimo?” dugang-pangutana ni Nelson.

Wala motubag si Gemma sa pangutana ni Nelson apan paraygon kaayo kini og tinan-awan nga mitutok sa ulitawo. Nahukman ni Nelson nga dili na siya maglangan-langan pa og daygan na niya sa iyang gibati si Gemma.

“Dalia ra nako nga mibati og gugma nimo Gem uy. I love you,” wala na g’yud magpaliko-liko pa si Nelson sa pagtug-an sa iyang gibati ngadto sa dalaga. Padayon nga mitutok si Gemma kaniya ug paraygon kaayo ang tinan-awan.

Nasabtan ni Nelson nga wala ikasuko ni Gemma ang iyang pagpanguyab. Mora’g nalantawan na niya sa unahan nga iya ra nga maangkon ang gugma sa dalaga. “I love you too,” matud ni Gemma nga miparayeg na g’yud kang Nelson.

Naglumpayat sa kalipay ang kasing-kasing ni Nelson nga wala gayud siya lisud-lisura ni Gemma sa iyang gihalad nga gugma. Gilipay nila ang ilang kaugalingon pinaagi sa pagsayaw pa dungan sa sadya kaayo nga mga tugtog.

Miinom pa sila og tagsa ka botelya nga beer. Apan nadugangan ang pagkalipong ni Gemma tungod sa iyang nainom. Milingkod sila og misandig na si Gemma sa dughan ni Nelson.

“Nalipong man ko Son uy,” ni Gemma pa. - Sumpayan