Si Artemio ug ang Senyor Santo Niño

Gipahiluna ni Artemio  ang lingkoranan nga maoy iyang gihimong tungtonganan ug gikuha  niya ang pisi nga  nylon nga iyang gipalit sa mall  human sa ilang panagsulti ni Agaton sa usa ka fastfood chain nga ilang gisudlan ug nagdali kini  sa pagpauli nga daw gikumot ang dughan tungod sa gibati nga hilabihang  kaguol.

Nag-inusara si Artemio sa apartment nga iyang gipuy-an niadtong higayona tungod kay  ang mga boardmate niyang kauban nga sagad mga tinun-an sa kolehiyo  nag-iyahay man sa pagpamauli sa ilang tagsa-tagsa ka probinsiya sa pagpahimulos sa semestral break vacation.

Alas 5 pasado na ang takna sa hapon nga nahiuli si Artemio ug misulod kini sa lawak ug nanirado sukwahi kini sa naandan nga mo-standby sa gawas sa dili pa matulog.

Guwapo  nga pagkalalaki si Artemio ug may igo gayod nga pamarog. Gikaibgan kini sa iyang mga classmate nga babaye dihang nagtungha pa kini  sa kolehiyo .

Bisan sa mga babaye  nga iyang  kauban sa call center nga  gitrabahoan daw gibati gayod og kaanugon kang Artemio nga nahimo kining mahuyang ug wala gayod mahingpit nga lalaki.

“Pastilan, Mea,” mapahiyumon nga namulong si Jessica ngadto kang Artemio dihang gikadungan kini niya og snacks sa canteen sa ilang gitrabahoan nga call center. “Kun lalaki ka pa lang  dili gyod ko mobalibad nimo ug imo kong agdahon nga mo-check-in ta og motel.”

“Saba ka diha, Day, uy,” ni Artemio pa nga miagik-ik og katawa. “Kilatan ta.”

Samtang sa ilang panagtagbo ni Dino kaganihang buntag daw dili niya madawat ang gisulti niini ngadto kaniya.

“Magminyo na  ko Mea,” ni Dino pa ngadto kang Artemio sa  ilang panagtagbo sa  fastfood chain nga ilang gisudlan. “Gusto ko nga mutambong ka sa akong kasal.”

Dihang nadungog  ni Artemio ang maong kasayuran daw gibati niya ang hilabihan nga kaguol. Alang kaniya daw gidat-ugan siya sa nahugno nga kalibutan.

Mitungtong si Artemio sa bangko ug gibalighot ang tumoy sa pisi nga nylon sa ibabaw nga bahin sa sulod sa iyang lawak. Ug dihang ibalighot na unta niya ang pisi sa iyang liog kalit lamang nga naabli ang pultahan ug maoy misugat sa iyang panan-aw ang misulod nga batang lalaki nga daw masuk-anon og panagway nga nagtan-aw kaniya.

“Hoy,  Temyong!”  sa bata pa. Pagkamubo gyod anang imong kabuot. Ang uban mangandoy nga moguwapo unta ilang hitsura, unya ikaw imong giusik-usikan  ug maghikog pa gyod ka!”

Daw misurok ang dugo ni Artemio sa hilabihan nga kapungot. Gibuhian niini ang pisi ug miambak sa bangko nga iyang gilingkoran.

Ang bata nga nagtan-aw kang Artemio nga miambak kini sa bangko  daw gibati usab og kahadlok maoy hinungdan nga nagdali kini og gawas ug midagan pahilayo sa apartment.

Nakita kini ni Artemio nga maoy hinungdan nga iya kining gigukod hangtod nga nahidangat siya sa daghang mga tawo nga nagprosisyon nga maoy hinungdan sa pagkahanaw sa bata.

Gipangita kini ni Artemio ug wala lamang damha nga nasawod sa iyang panan-aw ang karo nga nakapahingangha kaayo kaniya kay ang bata nga iyang gigukod nagpatong na man niini.

“S-siya?!” nagkanayon si Artemio sa iyang kaugalingon. “Ang bata nga akong gigukod ang…. S-senyor Santo Niño?!”

Misunod si Artemio sa taas kaayong lumbay sa mga tawo nga mikuyog sa prosisyon nga piskay na nga nanglakaw ug wala na magkiaykiay.  (Katapusan)