Magsinulog si Tudya kun mouli na ang bana

“Hapit na sab da ang Sinulog kon kapistahan ni Senyor Santo Niño sa Sugbo,” nakatuaw ning mga pulonga si Tudya samtang nagputo siya’g balanghoy ning usa ka kahapunon sa ilang baryo.

Taud-taod nang gibiyaan siya ni Medyong iyang bana kay nakigtaban sa biyudang seksi nilang silingan nga si Loling. Duha kabuok  anak nga lalaki ang gibilin sa iyang bana kaniya. Maayo gani kay may gamay siyang uma nga kabilin niya gikan sa iyang mga ginikanan nga bag-ohay pa lang nga nagsunod-sunod og taliwan ngadto sa laing kalibutan.

“Milagro siguro da ang Senyor Santo Niño kay miuli man gyud sa ilang kaugalingon si Kikay palikera bisan sa kadugay na sa panahon ... apan nanganti man gyud to si Tonyo hubakon nga magsinulog gyud siya kun mahiuli si Kikay sa ilaha,” naghunahuna niini si Tudya samtang nagbutang siya’g asukar ug lubi sa potong balanghoy.

Mao tong nagsige na si Tudya og ampo ngadto sa Senyor Santo Niño adlaw ug gabii nga unta mahiuli na si Medyong. “Kinahangaln magsinulog ko ngadto sa Batang Niño kun mahiuli ang akong bana,” nanganti ini si Tudya.

Bisperas sa Sinulog. Usa ka buntag niana samtang nagdigamo siya sa pamahaw, dihay usa ka tawo nga nagsambilay og putos, hugaw ang pamayhon ug gihutoy sa iyang ubo ug diretsong kalup-og dapit sa pultahan sa ilang kusina. Iyang giduol ug namay-ongan niya nga si Medyong diay!

“Tudya, pasayloa ko sa sala nga pagbiya ko kanimo  ug sa atong mga anak. Nagbasol nako...hu, hu, hu”, namulong sagol bakho si Medyong samtang gipahiluna siya og pahigda sa iyang asawa. “Gibiyaan ko Tudya sa lampingasan ug gihurot niya’g dala ang kwarta kong tinipigan ug mikuyog siya ug usa ka batan-on..., pasayloa intawon ko asawa ko!’’, pakilooy ni Medyong. Mikalit lang og kahilom ang palibot ug dihay talagsaong kalipay ang mikulit sa dagway ni Tudya ug mitutok kini sa iyang bana dayong singgit niini og “Pit Senyor! Salamat sa Batang Niño kay ikaw iyang gipaamgo ug mibalik kanamong imong pamilya!..., gipasaylo ko na ikaw Medyong”.

Gituman niya ang iyang saad. Nagsinulog si Tudya luyo sa bagang duot sa katawhan nga misaksi sa kapistahan ni Senyor Santo Niño! (Katapusan)