Call Center Agent

Nabatasan na ni Nelson nga mutambong gayud siya’g misa kada adlaw sa Basilica basta magkaduol na ang kapistahan ni Senior Santo Niño.

Ikatulo na kini’ng tuig nga wala g’yud siya’y palta sa pagsimba ug pagyukbo sa iyang idolo. Wala usab malimot si Nelson nga diha sa Pilgrim Center niya ikahimamat si Gemma.

Nag-uwan niadtong higayuna ug wala makapunit og payong si Gemma pagdayon niya’ng saka sa Pilgrim Center. Mibunok pagkusog ang uwan.

Abtik kaayo si Nelson nga nakapayong ni Gemma nga diha sa iyang tupad. “Salamat,” matud ni Gemma nga mipahiyom kang Nelson. “Ayaw kataha miss, dikit lang nako kay para dili ka mabasa sa uwan,” ni Nelson.

Mora sila’g kuyog kun tan-awon kay gipayongan man ni Nelson si Gemma bisan og wala pa gani sila magkailhanay. “Ipakita nato ang pag-igsuonay,” milanog ang tingog sa pari didto sa altar.

Milingi si Gemma kang Nelson ug mipahiyom. “Dili ka mangalawat?” gipangutana ni Gemma si Nelson. “Yuna ako diay si Gemma,” paila ni Gemma sa tingog nga maguwang lang sa hagawhaw. Nagkuyog sila paglinya aron mangalawat. Gipayongan gihapon ni Nelson ang dalaga. “Ka caring nimo uy bisan og bag-o pa kita nga nagkahimamat,” matud ni Gemma.

Human sa misa nagdungan sila pagkanaug. Mihinay-hinay na sa pagtuang ang uwan niadtong higayona. “Imbitahon tika Gem og lunch kay hapit na man ‘sab udto,” matud ni Nelson.

Wala mobalibad si Gemma. Nanulod sila sa Tsaw Queen atbang ra sa Basilica ug miorder og pagkaon. Samtang nagpaabot sa ilang giorder nga pagkaon, nagkalingaw sila sa pagsultihanay.

Nagsuginlanay sila sa ilang pagkatawo. Call Center agent diay si Gemma ug gabii ang iyang duty karong buwana mao adlaw gayud siya nga mosimba.

“Swerte ko karon Gem kay gikaila ko ikaw nga very friendly,” matud ni Nelson nga miulog-ulog og dayeg sa dalaga. Mipahiyom si Gemma ug mibawos pagdayeg-komedya ni Nelson.

“Ako maoy swerte Son kay kun wala ka pa, basa na kaayo ko sa uwan,” matud ni Gemma nga nagpahiyom. Kalma kaayo sila nga mikaon sa ilang order mora’g mauwaw nga mobuka sa ilang baba.

Naghuna-huna og paagi si Nelson unsaon nga dili na mauwaw kaniya si Gemma ug dili na usab siya mauwaw sa dalaga. “Gikan dinhi Gem, pwede ubanan tika sa pagpauli para makatultol ko sa imong gipuy-an kay basin og mobisita ko kanimo pipila ka adlaw gikan karon.”

 â€œSure why not? Maayo hinoon kay ikaw ang makabayad sa taksi,” matud ni Gemma. “Dili problema na,” dali nga tubag ni Nelson. Kanunay’ng gipasiklapan ni Nelson si Gemma ug iyang nasuta nga may kaanyag ‘sab g’yud nga ikapasigarbo ang dalaga. – Sumpayan