Pista Senyor: Pangaliya ni Sr. Sto. Niño

Nagpunsisok ang nanimba sa misa-nobena ni Sr. Sto. Niño. Ang Pilgrim Center napuno sa nanagbarog mga anino, miawas hangtod na gawas sa gate, diin ang mga dalan nga naglibot sa Basilica naghuot usab sa liboan ka debotos.

Wala panumbalinga ni Gemma ang kahugot sa panagdul-it sa nanimbahay nga iyang giwaling aron siya makaagi ug makasulod hangtod ngadto sa atubangang bahin sa Pilgrim Center. Wa na lang gani niya tagda ang nagkalainlaing baho sa singot nga usahay iyang mahanggap sa iyang taudtaod nang pagsige’g ulukiok. Ang importante nga makaabot siya didto duol sa altar, diin tin-aw niyang makita ang imahen ni Sr. Sto. Niño.

Ug pinaagi sa iyang pagpakigbisog, nakab-ot ang iyang tumong. Nakapuwesto gyod si Gemma nga nagbarog duol sa nagmisa nga pari. Aduna siya’y dakong problema.

Gusto ni Celso, iyang bana nga manganak na sila’g lalaki. Apan si Gemma, dili na! Upat na baya ilang liwat. Nakaporke lang,kay pulos babaye. Di lalim ang manganak. Ang tinahian mabitas. Ug ang mabitas tahion pag-usab. Haskang sakita! Ikaduha, giadbaysan siya sa doktor nga di maayo alang kaniya nga mabuntis pa sanglit iyang matris nipis na. Basi’g may kinabuhi nga maalaot.  Pero wa siya paminawa sa isog niyang bana. Hinunoa, mibahad pa:

“Aw, kun di ka, Gem, sa lain na lang ko mosulay’g tisok.”

Mao ni rason nganong naninguha gyod si Gemma nga makapuwesto duol sa altar sa Pilgrim Center. Gusto siya nga maka-eye to eye sa pagpakig-istorya sa Balaang Bata aron magpatabang pagsulbad ning iyang suliran. Tuod man, pagsulbong sa awit sa ‘Bato Balani Sa Gugma’, diin hinay’ng giwarawara sa mga debotos ang ilang palad, mitulo ang mga luha ni Gemma samtang nagtutok sa milagrosong Imahen ug nangaliyupo:

“Sr.. Sto. Niño, Ikaw ang among dangpanan, ang among gabayan ug ang among paglaom. Di ko buot nga mabungkag among pamuyo. Bisan kuyaw akong kahimtang nga maburos na pod, ihatag ko na lang sa akong bana ang unsay iyang gusto. Andam ko sa pagsakripisyo tungod sa akong gugma kaniya, Ginoo. Kanimo, isalig ko ang tanan.”

Dugay na kadtong pangaliyaha. Kinse na ka Sinulog ang nakalabay. Ug karon nga naghinangat na sab ang 2014 nga kapistahan ni Sr. Sto. Niño, ning ikapitong misa-nobena, ania mibalik si Gemma nga nagtindog atubangan sa altar sa Pilgrim Center. Apan wala na siya mag-inusara. Kuyog na niya ang iyang bana ug ilang lima ka anak, diin ang kinamanghoran usa na ka ambongang bayongbayong. Tibuok pamilya, ania sila aron sa pagpasalamat ni Sr. Sto. Niño sa paghatag niini og katumanan sa pangaliya nga kanhi gipangayo ni Gemma.

Busa, dungan sa dakong lawod sa katawhan nga miisa sa ilang tuong palad, silang Gemma mipataas sab sa ilang kamot dayong siyagit: “Viva Pit Senyor!” (Katapusan)