Natingob

Dear Tita Salie,

Maayong adlaw. Tagoa lang ko sa ngalan nga Ms. D. from Carcar, Cebu. Usa ka dalaga ug nagproblema ko sa akong love life. Manghinaut ko nga imo kong hatagan og pagtagad.

Duna ko’y boyfriend ug love kaayo nako siya. Akong gibuhat ang tanan aron malipay siya sa among relasyon tungod kay ako mang nakit-an nga love pud ko niya.

Pero duna ko’y amigo, Tita Salie, nga nanguyab nako. Wala gyod ko’y feelings niya kay natingob gyud didto sa akong boyfriend. Busa ako siyang giprangkahan nga dili gyud ko kay duna na ko’y uyab. Apan nagsige lang gihapon siya. Okey ra kuno niya nga duna ko’y laing uyab basta sugton lang nako siya.

Mora ba og gusto niyang gub-on ang among relasyon, Tita Salie, kay dili man gyud siya mohunong. Unsa may angay nakong buhaton,Tita Salie? Palihug pasabta ko. Daghang salamat.

* * *

Good day Ms. D.,

Dili man seguro maguba ang inyong relasyon sa imong uyab kun imong sultian daan siya nga dunay nagsamok-samok kanimo karon. Mas maayo nga masayod siyang daan aron dili siya magduda kanimo ug makaingon unya siya nga duna kay gililong kaniya.

Prangkahi usab ang imong amigo nga wala kay pagbati kaniya ug lahi kang pagkababaye. Ug sultihi siya nga sa sunod niyang pagpamisita kanimo dili na nimo siya atubangon kay dili ka gusto nga mahiubos kanimo ang imong hinigugma.

Sultihi siya nga mohunong na kay nag-usik-usik lamang siya sa iyang panahon kay dili gyud ka madala. Ug igo na kini nga imo siyang sultihan ug dili na kana nimo sala kun ugaling dili nimo siya tagdon. -- Tita Salie