Panagbagat sa Sinulog

Pit Senyor, Rosalie...! “Pit Senyor, Galileo...!” Parehas nga nagkatawa sila si Galileo ug Rosalie ning udtoha sa may Fuente Osmeña Circle, dihang wa damha, nagkabagat sila samtang miuliot paglakaw sa nagdasok nga mga tawo nga misaksi sa street dancing sa gipahigayong Sinulog Festival daplin sa dalan.

“Gikan ka pas Mabini, Bohol, Ros?” sukot ni Galileo kang Rosalie nga parehas niyang gradwado sa kursong Creative Writing ug managsama usab sila nga mga biyudo ug biyuda nga padayong nahilig sa panulat.

“Oo, Gal! Mituyo ko’g anhi sa siyudad sa Sugbo aron motan-aw sa sadyang Sinulog sa kadalanan! Ug tingob sab nakong gikobra ang agi ko’s panulat sa Banat News...!”

“Mao ba? Kinsay kuyog mo, Ros....?”

“Nag-inusara ko! Nag-estar ko’g pension house....!”

“Maayo kay nagkaparehas tang wa manglukat og tiket sa Sinulog aron adto motan-aw sa mga contingents sa Sinulog sa grandstand sa Abellana Sports Complex, Ros....!”

“Oo, Gal! Mas ganahan kong mosaksi sa Sinulog dinhi sa rota sa kadalanan...!”

“Maayo kay wa kay kuyog, ron, Ros! Dapiton tika sa pag-adto sa bag-o kong balay sa Lahug...!”

“Aw, nagpista man kaha kas balay, mo, Gal...!”

“Apan mag-lunch una ta sa Jolibee sulod sa Robinson sa atbang!”

“Sure! Bangkahan man kaha ko nimo, Gal...!”

“Ako’y bahala, Ros! Nindot ikasultisulti atol sa Sinulog ang usa ka biyudang writer...!”

“He-he-he! Abi kay biyudo man sab ka...

Ang asawa ni Galileo namatay sa breast cancer ug wa sila’y anak kay daotan og matris ang mitaliwan niyang asawa. Ang bana sab ni Rosalie, namatay sa lung cancer kay hinabako usab kadto nga usa ka mauswagong negosyante sa Bohol. Wa say anak si Rosalie kay baog ang namatay niyang bana.

Sa sulod sa Jolibee, malipayon nga nagsalo sa paniudto sila si Galileo ug Rosalie.

“Sa atong edad nga parehas nga 40, Ros, mora’g gitakdo ang duha ta ka dalan...!”

“Bitaw, Gal! Parehas nga biyudo ug biyuda tang duha nga way anak!”

“Parehas sab tang mga creative writer kay dungan man tang migradwar sa atong kursong Creative Writing! Ug kabisado na nato ang atong tagsatagsa ka kinaiya, Ros...!”

“Unsay buot mong ipasabot, Gal....?”

“Takduon ta ang duha ka mga kasingkasing, Ros...!” ug gikuptan ni Galileo ang tuong palad ni Rosalie ug gihapuhap. Wala mosupak si Rosalie. Hugot nga nagkatinutokay silang duha ug daw nagkasinabtanay ang kinidlap sa ilang mga tinan-awan. Ug ang hinagtob sa pinitik sa ilang mga kasingkasing daw nakigduhawit sa lagubo sa mga tambol sa kadalanan nunot sa nagpadayong pagsayaw sa mga misalmot sa Sinulog Festival. (Katapusan)