Anak sa dinakpan - Gula 3

Nangayo’g pasaylo kang Regner ang amahan ni Zeny tungod sa iyang pagtubag-tubag niini sa traffic enforcer dihang siya gidakop. Wala na lang motubag pa si Regner.

Nag-ilis si Regner sa iyang uniporme pagka-traffic enforcer. Sa iyang paggawas sa hawanan sa balay, mitutok si Zeny kaniya ug nagkatagbo ang masi’g nila ka tinan-awan.

“Kun dili pa tungod ni Zeny nga mihilak ug nagpakiluoy dili ko gayud ikaw tabangan. Suwerte ka nga gipangga ka gyud sa imong anak,” giingnan ni Regner ang PUJ driver.

Dili sila makarga sa motorsiklo ni Regner. “Kuan, ingon ani na lang, kami na lang si Zeny ang mokuha sa imong lisensya sa LTO, paabuta na lang siya sa inyong balay, dali ra mi,” matud ni Regner.

Mitangdo ang amahan sa dalaga nga nakasabot nga i-angkas na lang sa traffic enforcer ang iyang anak paingon sa LTO. “Salamat kaayo Sir ha?” sa PUJ driver pa, dayong lakaw.

Misakay si Regner sa iyang motorsiklo ug gitunolan niya’g helmet si Zeny. Human masul-ob ni Zeny ang helmet, miangkas dayon kini sa motorsiklo sa traffic enforcer.

Dali ra nga nakuha ni Regner ang lisensya sa amahan ni Zeny. Migasto g’yud si Regner og kapin sa P4,000 tungod sa kalapasan nga nahimo sa dinakpan niini nga PUJ driver nga amahan sa dalaga.

Gitunol ni Regner kang Zeny ang nalukat nga lisensya ug ang resibo sa gibayad niini. “Salamat g’yud kaayo Sir ha pagtabang nimo namo ni Papa? Makapalit na g’yud mi’g bugas kun makabalik si Papa sa pag-drive” matud ni Zeny.

“Kay ngano, wala g’yud mo’y bugas sa balay?” gisukna ni Regner ang dalaga. “Wala g’yud lagi Sir. Ambot kun nakahuwam ba kaha kadto og kuwarta si Mama sa among silingan,” sa dalaga pa.

Naluoy kaayo si Regner ngadto sa dalaga. “Tana, mangaon usa ta unya tabangan tika nga makapalit ka’g bugas nga madala sa inyong balay sa imong pagpauli,” matud sa traffic enforcer.

“Ayaw na lang Sir uy, subra na kaayo ang imong gihimo nga tabang kanamo,” matud ni Zeny. “Matud bitaw sa panultihon nga puslan man nga nabasa na g’yud, maligo na lang,” mipahiyom si Regner.

Misulod sila sa usa ka kan-anan duol sa South Bus Terminal. “Zen, ayaw na ko’g tawga pa og Sir, tawga na lang ko sa akong ngalan, Regner,” giingnan niya si Zeny.

“Sige gud ikaw ang masunod Regner,” ni Zeny. Paghuman nila’g kaon, gikuot ni Regner ang iyang pitaka ug gitunolan og tibuok usa ka libo ka pesos si Zeny.

“Dawata ni Zen, magamit na nimo kini pagsulbad sa imong problema. Sige kay mo-duty na ko,” matud ni Regner. Mitutok pag-ayo si Zeny sa traffic enforcer. - Sumpayan