Isla Paraiso - Gula 59

Gi-interview sa taga radio ug print media personality ang mga empleyado sa gasolinahan nga gitulis. Gikuhaan usab nila og pamahayag si SPO3 Rey Corpuz.

Pagkilab sa pipila ka gutlo, ang patay’ng lawas sa tulo ka tulisan gidala na sa usa ka punerarya sa dakbayan sa Sugbo.

Sila si Rey namalik ngadto sa kuwerpo sa kapolisan. Midiretso siya sa lawak sa buhatan ni Capt. Sancho Benale aron pagtaho niini sa kapolisan sa ilang lakaw.

“Good work, Corpuz,” matud ni Capt. Benale nga mipikpik sa abaga ni Rey. “Sa imong gibuhat, nakasiguro ako nga mobati na og diyotay’ng kahadlok ang mga badlongon sa katilingban.”

“Daghan pa kining mga badlongon nga imong giingon, Sir, nga angay namong hiposon.”

“Hinay-hinay lang, Corpuz. Masulbad ra gihapon nato sa hingpit kining nagkadaiyang krimen nga naghitak karon sa dakbayan.”

Kahilom.

“Apan kinahanglan nga magmatngon ka kanunay, Corpuz,” mipahimangno si Capt. Sancho Benale.

“U-unsay buot mong ipasabot, Sir?” Ingon sa wala’y nasabtan si Rey sa gipamulong sa iyang opisyal. -- Sumpayan pa