Pit Senyor: Ginagmay nga panginabuhi sa piyesta Senyor

Ang tinuig nga pangilin ni Senyor Santo Niño dako usab og gikatabang sa ginagmay nga pagpanginabuhi sa pipila ka mga tawo  kay mao man usab ang mga adlaw modako ang ilang kitaon niini. Nag-una nga makatagamtam og dako nga kita mao ang mga drayber sa PUJ, taxi ug mga V-hire nga sakyanan tungod sa pagdagsang usab sa mga deboto nga motambong sa matag oras nga misa sa Basilica Minore del Santo Niño de Cebu hangtod na sa adlaw sa kapistahan nga mao usab ang pagpasiugda sa tinuig nga sinulog.

Si Carlos  Sumalay, 43 anyos, minyo nga taga Yati, Liloan ug drabyer sa PUJ nga nagbiyahe sa Manalili sa dakbayan sa Sugbo ug Mandaue nga nahinabi niining tagsulat miingon nga dako gyod ang ilang kitaon sa pagpamasahero sa mga adlaw nga nagpadayon pa ang misa alang sa kapistahan ni Senyor Santo Niño.

“Bisan mahal karon ang bugas,” ni Carlos pa nga mapahiyomon nga nakighinabi niining tagsulat. “Makapalit man gihapon ta og sinako.”

Si Rocky Atiss, 33 anyos, minyo nga lumad nga taga Catmon,  Cebu nga naninda og payong nga nahinabi niining tagsulat miingon nga siya ug iyang asawa maoy ania karon sa dakbayan sa Sugbo sa pagpahimulos sa kahigayonan  sa piyesta ni Senyor Santo Niño pinaagi sa pagpangita og ginagmay nga panginabuhi.

Giangkon niya nga naglisod gayod sila sa ilang kahimtang karon  sa ilang dapit human sa pagkusokuso sa bagyong Yolanda mao nga nangita sila og paagi nga makahinayhinay og balik sa ilang panginabuhi. Matud pa niya nga deboto usab sila nga magtiayon ni Senyor Santo Niño maoy hinungdan nga matag piyesta ania gayod sila sa dakbayan sa pagtambong sa mga misa.

Kaniadto sa panahon nga motambong sila og mga misa  daan na magsige og komedya niya  iyang asawa nga maayong ipaninda kay nakita man niini ang daghang mga tawo nga mamalit sa bisan unsa lang nga ibaligya sa mga manindahay.

“Natinuod na gyod hinuon,” ni Rocky pa nga nagkatawa nga namulong niini. “Okay ra man pod diay kay gawas nga makasimba pa ta sa mga misa nga himoon, makapanguwarta pod ta og ginagmay.

Dugang pa ni Rocky nga sa mineral water unta ang ilang gibaligya ug sa iyang asawa apan hinay man ang halin kay bugnaw man ang panahon mao nga mitakli na lamang usab sila sa pagpamaligya og payong ug ang iyang asawa  candy ug sigarilyo usab ang gibaligya niini.