Anak sa dinakpan

Gula 2

Gibati og kalooy si Regner dihang nakita niya ang mga lusok sa luha nga nanaligdig sa kaapingan sa babaye nga anak sa drayber nga iyang nadakpan tungod sa pagka abusado nga momaneho’g sakyanan.

“Unya unsa may gusto nimo nga mahitabo karon miss nga mianhi ka man sa among balay?” gipangutana ni Regner ang babaye. Wala dayon motubag ang babaye mao nga gitutokan kini pag-ayo ni Regner.

Diha pa niya masuta nga maanyag diay ang babaye nga anak sa drayber nga iyang gidakop. Bisan og wala motubag ang babaye sa iyang pagpangutana kun unsay tuyo niini kaniya, apan nasabtan ni Regner nga gusto kini nga magpatabang nga makuha ang lisensya sa iyang Papa.

Nakapangutkot sa ulo si Regner tungod kay lisud kaayo ang pagkuha sa lisensya nga naisyuhan na og TOP. “Unsay ngalan nimo miss?” gipangutana ni Regner ang anak sa dinakpan niya nga drayber.

“Zeny,” mubo nga tubag sa babaye samtang nagpamahid sa iyang luha. “Sigi sir, molakaw na lang ko kay wala ka man kaha’y ikatabang nga mapagamay ang multahan ni Papa. Luoy man gud kaayo mi kay karon gani wala na mi bugas para paniudto,” matud ni Zeny.

Daw gihilap sa kalooy ang kasing-kasing ni Regner nga nakadungog sa gisulti ni Zeny. Mitindog na si Zeny aron molakaw. “Ayaw una paglakaw. Sigi, tabangan ko na lang ang imong Papa nga malukat ang lisensya,” pintok ang tingog ni Regner.

“Mag-coffee usa ta Zen. Kalimti na ang imong problema kabahin sa lisensya sa imong Papa kay ako nay mobayad sa iyang multahan didto sa LTO,” matud ni Regner samtang gitutokan niya si Zeny.

Daw milukso sa kalipay si Zeny nga nakadungog sa gisulti ni Regner. “Tinuod ka sir nga tabangan ko nimo nga makuha pagbalik ang lisensya ni Papa?” ni Zeny pa nga may mibathay na nga pahiyom sa iyang panagway.

Milutaw na gayud ang iyang kaanyag ni Zeny dungan sa iyang pagpahiyom. “Wala ko magkomedya. Sigi, ibanan na lang nako ang P20,000 nga nadawat namo gikan sa City Hall. Pinaskohan na lang nako ni kanimo Zen,” matud ni Regner.

Giingnan ni Regner si Zeny nga mobalik  pagka Lunes uban  sa iyang amahan kay magdungan sila pag-adto sa LTO aron lukaton ang iyang lisensya.

Pagbiya ni Zeny sa balay nila ni Regner, gipasundan kini sa panan-aw sa ulitawo. Sa hilom nakadayeg siya sa kaanyag sa dalaga.

Tuod, pagka Lunes sayo kaayo sila si Zeny ug ang iyang amahan nga miadto sa balay ni Regner. “Sori kaayo sir ha nga nakasamok ko nimo. Gikan karon, isaad ko nimo nga dili na g’yud ko magpakasala pa sa akong pagmaneho,” matud sa amahan ni Zeny. - Sumpayan