Gibangkong na

Miabot sa Sugbo si Teban uban sa iyang pamilya sakay sa DC-130 sa PAF. Namakwit sila gikan sa Tacloban tungod sa kagutom ug kauhaw human sa kusog nga bagyong Yolanda. Gisugat sila sa iyaan sa Mactan Airport nga way dala nga kuwarta.

Didto sila papuy-a sa Talisay tipon sa mga anak sa iyaan. Nagsalig lang si Teban sa hinabang sa gawas gumikan sa awhag sa ig-agaw’ng Ricky nga nagpuyo sa Amerika pinaagi sa iyang facebook.

Tungod sa kawad-on, nakahunahuna si Teban pagpangita bisan unsang trabaho sa Sugbo aron ang suweldo magamit nila sa ilang gusto. Mao nga nananghid si Teban sa iyaan ug sa paglibot niya sa dakbayan, maoy nakita ni Teban ang gipapilit sa may koral: Wanted Houseboy.

Sa pagpanuktok niya, giablihan dayon sa batan-ong babaye nga katabang ug nangutana: “Unsay tuyo mo, Noy....?”

“Taga-Tacloban ko, Day...! Nagkinahanglan ba mo’g house....?” Nangutana si Teban sa batan-on nga babayeng katabang. Una mosanog, giduol sa katabang ang naglingkod sa lawn chair nga agalong babaye nga tambok. Ang ngalan sa agalon nga babayeng tambok mao si Violy.

“Pasudla siya kay kami ang mag-estorya....!” Matud pa sa agalon.

“Pasudlon ka Noy ug kamo na’y mag-estorya...!” Sa katabang pa nga miagni niya. Misulod dayon si Teban ug nangayo’g katahuran.

“Gikan ka pa sa Tacloban. Komusta man didto....?” Sanosano nga pangutana sa babayeng tambok nga midagkot sa sigarilyo.

“Daghang patay ug nangapayhag ang mga balay, Ma’am...!” Tubag ni Teban.

“Tawon sad uyyyyy...! Unya, mosulod ka pagka-houseboy?” Misuna ang tambok nga babaye.

“Oo, Ma’am, kon mahimo....!” Mapaubsanong tubag ni Teban.

“Dali sa sulod aron masinati ang imong buhaton...!” Ug misulod sa balay ang agalon nga gisundan sab ni Teban. Nakita ni Teban ang duha ka refrigerator nga didto sa kusina.

“Kanang refrigerator sa tuo, mao kana ang para sa upat ka iro. Ang sa wala nga bahin mao sad kana ang alang sa houseboy.” Misugod pagmustra ang agalon ug paghiling pa ni Teban, ang refrigerator dapit sa tuo, puno sa karne nga alang sa mga iro. Samtang sa wala nga bahin, puno sab sa mga utanon, buwad, ug ginamos nga alang sa houseboy sama kang Teban. Nangutkot sa iyang tingkoy si Teban nga mipungko atbang sa refrigerator. Nanghinoktok....!

“Andam ka pagdawat sa pagka-houseboy...?” Misukna ang agalong babayeng tambok nga mipabuhot sa aso sa sigarilyo.

“Moaplay na lang kaha ko pagka-iro....!” Tubag ni Teban dungan ang pagtindog. Wa dayon makatingog si Violy ug hapit malamoy ang sigarilyo. Mora’g nasud-ipan....! Ngeeeeek....! Wa kaha maliso ang utok ni Teban gumikan sa bagyong Yolanda...” (Katapusan)