Si Magda nga palikera

“Hapit na man ka manganak Magda dako na imong tiyan, hangtod ron wa pa gyud mi nimo sultii kinsay amahan ana. Kinsa man gyud ha, Magda?’’ pangutana ni Nanay Bening usa ka udto niana.

“Sus, si Nanay baya oy mangutana pa gyud. Wa lagi ko’y kalibotan ani kay puwerting hagok nako niadto kay nakatog ko samtang namista mo si Tatay Tonyo sa pikas baryo,” rason ni Magda samtang nanghaplas og lana sa nagabusyad niyang tiyan.

Wa nalang magsige og pangutana si Bening kay maglalis na sad unya sila ning butanga. Bugtong anak si Magda. Igo lang siya nakatapos sa elementarya kay tapolan kaayong moeskuyla. Nagpunay lang og panisko kuyog sa iyang mga amiga.

Tulin nga miligid ang panahon. Nanganak og usa ka batang lalaki si Magda.

“Maayo Magda kay nanganak  ka na. Ayaw na kana usbi kay dili lalim ang pagpanganak kasuway ka na man bitaw,” tambag ni Nanay Bening samtang nagkalingaw sa paghagwa-hagwa sa iyang apo.

“Sus, Nay dili lang gyud ko nimo mosaad nga dili nako magpahilabot og lalaki. Unsaon man malumoy man dayon ko kun gwapo ang manguyab nako labi na’g dako ang iyang bunal,” nagpahiyom nga mitubag si Magda.

“Hesus Maryosep!, hoy Magda hinunoa intawon sa makadaghang higayon na dili intawon sayon ang pagpadako og bata ning kalibotana!” singhag pa ni Nanay Bening.

“Si Nanay baya oy!, ma high blood man dayon. O lagi Nay paningkamotan nako nga di na mapun-an ning akong anak,” panapos ni Magda.

Apan unsang pagka unsaa nga maayo ra man sa saad si Magda, napun-an na man hinuon og duha ka buok iyang anak nga pulos lalaki. Tulo na tanan iyang mga anak sa nagkalain-laing lalaki.

“Unsaon kaha ni nako sa pagpadako ning akong mga anak. Lisod sad sumpoon ning akong pagkahigal sa mga lalaki. Liwat siguro ko kang tiya Loling da,” nakahanduraw si Magda sa hilom.

“Unsa na Magda?, naghinuktok ka man layo man kaayo ka’g panan-aw, unya resulta na. Gipasidan-an na bitaw tika wa gyud nimo gisilsil sa imong alimpatakan. Ikaw ra gyud ang mabasol niana Magda, ikaw ra’y gamugna nang kapalaran nimo,” ni Nanay Bening.

Nakapanghupaw og lawom si Magda ug miingon, “Maypag mo-apply ko pagka tindera og ukay-ukay sa lungsod aron makasustinir ko sa mga panginahanglan sa akong mga anak,” ni Magda.  “Maayo kay naka hunahuna ka ana,” ni Nanay Bening. “Sagdi lang Nay kung natakilpo ko sa makatulo, bisa’g palikera ko maningkamot ko nga dili magsalig sa uban,” namulong si Magda dayong lakaw paingon sa lungsod! (Katapusan)