Isla Paraiso - Gula 56

“Ihatag ko kanimo Rey, ang pabor nga imong gipangayo. Makahimo ka sa pagpamisita kanako dinhi sa kombento. Apan hinaot nga dili mo kini abusohan.”

“U-unsay buot mong ipasabot? Midiyong ang mga mata ni Rey nga mitutok sa madre.

“Dili ako makigsulti kanimo’g dugay kun mahiatol nga anaa ang among madre superyor,” mipasabot si sister Veronica. “Maikog ko. Ug hinaot nga makasabot ka niana.”

“Nakasabot ko, sister Veronica,” ni Rey pa.

“Daghang salamat kun mao kana,” sa madre pa.

“Daghang salamat usab sa paghatag mo’g pagtugot kanako nga makapamisita ug makapakigsulti nimo dinhi sa kombento.”

“Okey lang.”

Ug nanamilit si Rey kang sister Veronica. Mituang na niadtong higayon ang kusog kaayong ulan. Migawas si Rey sa kombento nga mibati og tumang kahayahay sa kahiladman. Igo lang giserad-an ni sister Veronica ang tanang pultahan ug mibalik na siya sa iyang lawak. Mibati na siya’g pagduka.

Paghigda ni sister Veronica sa mahunolhunol nga kama sulod sa iyang lawak nga katulganan, gipiyong niya ang iyang mga mata. Wala madugay, nagpauraray na siya sa sabakan ni Nanak.

Pagkaugma sa buntag, samtang naglingkod si SPO3 Rey Corpuz atubangan sa lamesa ug nalingaw sa pagpangutingkay sa mga folder, mikuriring ang telepono nga gipatong sa ibabaw sa iyang lamesa. -- Sumpayan pa