Lig-on og backer

Alas siyete sa gabii. Maoy takna sa pagkanaug ni Desto sa panimalay ni Elena nga iyang gipamisitahan. Hapit kada adlaw siyang namisita sa dalaga. Hapit upat na ka bulan. Apan hanap ang paglaum. Pero samtang wa pa siya balibari ni Elena, maninguha lang gyud siya’g pamisita.

Labngonon og sapa ang nahimutangan sa balay ni Elena. Unya may tulay agianan nga habog, ibabaw sa duha ka tampi sa sapa. Kanunay mag-agian si Desto ining taytayana. Kay way laing agianan. May tagsa ka sugang dagitabnon ang masig ka tumoy sa tulay. Unya karon may dan-ag sa bulan kay hapit na motakdol.

Pag-abot ni Desto sa tungatunga sa tulay, diin bayente metros na lang, makalabang na siya, nikalit og uyog ang tulay. Mora’g naglinog. Nihapa siya. Ug nikamang. Kay kun magpabilin siyang magbarog, mora siya’g malabay. Naghinayhinay siya’g kamang. Hangtud nakaabot siya’s tumoy sa tulay. Dako niyang kahibulong. Kay wa nag-uyog ang yuta. Tulay ra.

“Gihamok man tingale ko!” tuaw niya sa hilom.

Nakahukom siya’ng sa adlawan na lang mamisita ni Elena. Apan mao gihapon. Ini’g tunob niya sa tulay, mauyog dayon. Sa iyang kahadlok, wa na siya namisita ni Elena.

Dangta’g usa ka bulan, nakadungog na lang si Desto nga kaslonon na si Elena. Nakahunahuna si Desto og konsulta og albularyo kun nganong uyogon ang tulay ini’g agi niya.

“Kinugos og agta si Elena. Ug ang agta, dili boto nimo nga maoy mabana ni Elena,” matud ni Noy Turo, usa ka semana gikan sa iyang pagpangunsulta.

“Gisusi nako ang mga tagpuyo sa tulay. Maoy ilang pulong ngari nako. Primiro, wa ko katoo. Ako gyung giadto si Fernando, amahan ni Elena. Matud ni Fernando, sa pag-agi nila’s tulay sa adlaw nga pabunyagan si Elena, may tawo nga namugos nga mokugos ni Elena. Wa na lang balibari niya kay wa may mawa nila kun masobra ang mangugos. Apan pagkahuman sa bunyag, wa na gyud nila hikit-i ang maong tawo. Mahibulong lang sila kay kada Pasko ug birthday ni Elena, may magpadala niya’g mga regalong mahalong butang,” dugang ni Noy Turo.

“Kinsa may pamanhonon ni Elena?” ni Desto.

“Si Glen. Boto ang agta niya. Kay buotan kono ug kugihan. Bisa’g kabus, kaliwat og mga maayong pamilya ang ginikanan ni Glen. Ikaw wa mauyoni sa agta kay anak og datu unya may pagka-spoiled” ni Noy Turo.

Nakapangawot sa ulo si Desto. Gidawat na lang niya iyang kapildihan sa gugma. Kay lig-on og backer iyang karibal. (Katapusan)