Bugo nga abogado

Kaila ba ka ni Atty. Roger Manto? Pagkabugo anang abogadoha!” ni Charlie Juarez, konsehal sa lungsod sa Basawit. Naglungotlungot gyud siyang mangistorya bisa’g kinsay kaatubang mahitungod sa abogado. Kay gusto unta siyang mangahente sa yuta sa kliyente sa abogado. Apan gahi ibaligya ang maong yuta tungod kay ang kliyente, babaye ug ang bana Amerkano nga maoy nagtipig sa titulo. Ang nakaparat kay mobabag ang Amerikano kun dunay mopalit. Kay mangayo og bahin sa halin. Nag-divorce na man ang kliyente ug ang Amerikano tungod sa pagkapalahubog ug pagkahimun-og sa naulahi. Gusto ni Charlie nga maniobrahon sa abogado ang mga papeles aron di na makasamok ang Amerikano.

Si Jude Eyonok ang kaatubang ni Charlie karong buntaga sulod sa canteen sa munisipyo. Alas diyes ron ug coffee break time. Si Jude miyembro sa Bantay Dagat sa ilang lungsod, ug dunay giasekaso sa konseho mahitungod sa ordinansa sa illegal fishing. Kay nakasabot si  Jude nga siya gyud ang gisultihan ni Charlie mahitungod sa iyang paglibak sa abogado, nakahunahuna siya sa pagtubag. “Dili tingale bugo ang tawo, kun makapasar na sa bar, oy!” ni Jude. “Dili ba diay ka kaingon nga bugo siya? Nga wa may natabang sa iyang kliyente!” nangugat si Charlie.

“Wa kay katungod sa paghingan og bugo sa usa ka abogado. Labi na ikaw, wa gani kahuman og eskuyla abogasya,” ni Jude. “Niundang lang ko. Kay wa nay panahon. Dili tungod sa kabugo!” ni Charlie. “Ang naa gud sa imong utok, nga kun ang tawo, abogado na gani, kamao na motuis sa balaod. Dili man na mahimo ni Roger!” nangugat na sab si Jude. “Kaila diay mong Atty. Manto?” ni Charlie. “Dili kay kaila lang. Higala pa gyud mi. Dili kay higala lang. May pinagsamahan na gyud, mi. Busa, sakitan kong maminaw nga nganlan nimo’g bugo ang Ginoo sa akong pagtan-aw!” ni Jude. Namuwang mata sa kalagot. Hait na tinan-awan sa konsehal. Niduko ug nikutaw sa kape iyang gipabugnaw sa lamesa. Si Jude niinom sa sprite nga iyang giorder.

“Unsa may inyong pinagsamahan sa abogado?” ni Charlie. Nanglab-ok og laway. “Kami ang pioneer sa martial arts nga Ngoy-Ngin. Siya ang presidente, ako ang bise presidente sa mga opisyales sa among martial arts club. Gawas ana, gilabanan ko niya. Gikiha ko’g duha ka falsification of public documents ug duha ka recovery of land. Daug mi tanan. Mao nay bugo nga abogado?” ni Jude. Nitindog si Charlie. Nibiya. Kay wa siya magdahum nga di mosimpatiya niya si Jude. Nangita siya’g tawong mosaway sab sa abogado.

“Sunod gani makadungog ko nganlan nimo’g bugo si Roger, makatilaw na kas akong 25 ligthning kicks, buanga ka!” ni Jude nga nagsunod og tulisok ni Charlie nga wa na naminaw. Nanglingi ang ubang mga customers tungod sa pagtaas sa ilang mga tingog. (Kapalaran)