Matamata

Oy! Naunsa man nang mata ni Berto?” ni Tony ngadto’s iyang kapikas nga si Myrna. “Hinaya nang imong tingog. Basi’g hidunggan ka” ni Myrna. Nagtupad silang duha nga naglakaw padulong sa ilang balay luyo sa barangay hall sa baryo Sapigad.

Gikan silang nanimba sa second mass sa buntag sa San Bernardo Parish, tunga sa kilometro ang gilay-on. Nakit-an nilang nagtungkawo si Berto sa bangko atubangan sa tindahan ni Titang daplin sa karsada. Mao ni estambayanan niya tibuok adlaw. Ma-Sabado’g Domingo. Aron makapamantay sa tanang mga silingan.

Usa ka civil engineer si Berto. Nag-alagad sa Butalid Construction Company. Duna siya’y duha ka anak dalaga. Unya gipanghambog niya nga mga pormal nga pagkadalaga sila. Maria Clara ug mga kinaiya. Iyang gilibak ug gipanabi ang anak dalaga nilang Tony ug Myrna, nga burikat. Kay lainlain kuno og uyab. Unya daghang lalaki nga mga barkada.

Gikasakit nilang Tony ug Myrna ang maong panghimang. Kay dili tinuod. Apan wa sila nakig-away ni Berto. Aktibo lang si Sonia, ilang anak, sa choir sa simbahan ug sa Youth For Christ. Mga magtutudlo sila sa saring publiko. Ug dulot sa bukog ang ilang pahimangno ug maymay sa ilang anak mahitungod sa moralidad. Daghan gyud hinuong nangulitawo sa ilang anak. Kay gawas nga buotan, maanyag sab. Ang mga anak ni Berto, gawas nga laksot og hitsura, laksot sab og kinaiya. Maong way makighigala.

Nihinay sila’g lakang paghiduol ug pagtungod nilang Berto. Dapit sa wala ni Tony si Myrna. Usa ka dupa ang distansiya ni Tony ngadtong Berto. Tulo ka bulan nga wa nila kit-i si Berto. Kay kunohay nibakasyon sa Manila. Unya karon, pagkakita nila, may dakong kausaban. Lingin kaayo iyang tuo nga mata. Dili mamilok. Dili mulihok ang kalimutaw. Nisunod og tan-aw si Berto nila. Kalimutaw lang sa walang mata ang nisunod og tan-aw. Ang sa tuo wa maglihok.

“Artificial na man to iyang mata,” ni Tony dihang layo na sila ug di na madungog ni Berto. Duol na sila’s ilang gate sa balay.

“Sa ato pa, matamata lang? Dili tinuod nga mata?” ni Myrna.

“Malagmit. Aron tingale maminusan iyang kahimantayon,” ni Tony.

“Tukma sa wali sa pari ganiha nga nag-ingon ‘kun ang imong mata, magtukmod nimo sa kasal-anan, lugita na. Maayo pa nga wa kay mata apan naa sa langit. Kay sa kompleto ka’g mata unya naa’s impiyerno,” ni Myrna.

“Naunsa gyud kaha na iyang mata, no?” ni Tony.

“Ah, mangutana lang unya ta’s iyang mga higala” ni Myrna. Nanulod sila sa gate sa ilang balay. ( Katapusan)