Si Kumare Jelyn - Gula 4

Mipauli si Jomar sa iyang gipuy-an nga tugob sa kalipay ang kasing-kasing. Wala g’yud siya magdahum nga mahagkan niya si Jelyn sa usa ka wala paabuta nga sitwasyon.

Mora’g managsama sila si Jelyn nga daw gibato-balani ang mga pagbati. Wala mangulitawo si Jomar kang Jelyn apan wala siya makasabot nganong daw nalukmay ra ang dalaga dihang silang duha nagtinutokay.

Naghigwaos si Jomar ug dugay kaayo nga nakatulog nianang gabhiona. Maoy kanunay mohamok sa iyang kaisipan ang lumoy kaayo nga mga ngabil ni Jelyn nga midapat usab sa iyang mga ngabil. Gusto ni Jomar nga masubli pag-usab ang ilang paghagkanay ni Jelyn. Wala masayri ni Jomar nga si Jelyn usab diay niadtong higayona sama kaniya og gihuna-huna.

Wala usab makasabot si Jelyn nganong gaan kaayo siya og pagbati ngadto kang Jomar. Samtang naghigda sa iyang higdaanan, gigakus ni Jelyn ang mga sinena nga gipalit ni Jomar para kaniya atul sa ilang pagpanuroy kaganina.

Nakasabot si Jelyn nga hinay-hinay nga adunay miturok nga pagbati sa iyang kasing-kasing para kang Jomar. Apan diha sa iyang kaisipan ang kabalaka tungod kay nasiguro siya nga kwartahan si Jomar ug siya usa lang ka kabus.

Kalit lang misantup usab sa huna-huna ni Jelyn nga sigurado nga binuangan lang siya ni Jomar tungod kay mabdos na man gani siya sa liwat nila ug sa kanhi niya boyfriend nga karon naglikay-likay na kaniya. Apan misantup usab sa kaisipan ni Jelyn ang pangutana kun nganong nakigsuod man kaniya si Jomar bisan og nasayud kini nga siya mabdos na gani sa iyang boyfriend?

Wala na makaamgo pa si Jelyn nga samtang naghuna-huna sa iyang kahimtang takulahaw lang siya nga giganoy sa limbo sa katulogon.

Pagkabuntag, sayo nga mibangon si Jelyn ug nangareglar sa iyang kaugalingon. Wala niya kini buhata sa nangaging mga adlaw diha nga gisibat-sibatan na siya sa iyang boyfriend.

Kalit lang nga may nanuktok sa pultahan sa ilang balay ni Jelyn. “Jelyn diay nangita nimo,” matud sa iyang inahan. Pagtan-aw ni Jelyn sa pultahan nagkatagbo g’yud ang ilang panan-aw og ni Jomar.

“Paingon pa ko sa opisina Jelyn, gidad-an ko ikaw og makaon, maayo unta’g magustohan nimo kining pizza nga akong gidala nimo,” matud ni Jomar nga nagngisi.

Wala gayud magdahum si Jelyn nga buhaton kini ni Jomar. Walay pulong nga migawas sa iyang baba ug igo lang niya nga gitutokan ang ulitawo samtang gidalitan og matam-is nga pahiyom.

 Gibiyaan sila sa inahan ni Jelyn nga miadto sa kusina. “Sigi Lyn, dili na lang ko magdugay. I love you,” matud ni Jomar. Misamot nga natulala si Jelyn ug wala makatubag. - Sumpayan