Isla Paraiso - Gula 53

“Ang pagbati ko, Rey iya na sa usa ka madre. Unsaon ko sa pagtubag sa tuman nga kaugdang ang imong pangutana?” ni sister Veronica.

“Matubag mo lang kana, sister Veronica, kun tun-an mo ang imong kaugalingon sa paghigugma kanako,” nagkanayon si Rey. “Andam akong magpaabot hangtod moabot ang panahon nga imo akong higugmaon.”

“Tingalig mabawo ka lang.”

“Anad na ako sa kapakyasan, sister Veronica, kaniadto pa nga napakyas ang gugma ko kanimo. Apan wala pa ako kawad-i sa hingpit nga paglaom.”

“Apan dili ko gusto nga molaom ka, Rey.”

“Apan hatagi ako’g panahon nga ikapabati ug ikapasabot ko kanimo kun unsa ka wagas ug kaputli ang gugma nga gihalad ko kanimo.”

Wala motingog si sister Veronica.

“Kun lisod man gayod ako higugmaon alang kanimo,” ni Rey pa, “andam ako nga magpailob bisan pag magkahulogan kini og hangtod sa hangtod nga paghulat.”

“Nag-usik-usik ka lang sa imong panahon,” ni sister Veronica.

“Alang kanako, dili anugon ang panahon nga gigugol ko alang kanimo. Gani, kun buot ka, ipakita ko nga mahimong ihalad ko kanimo ang tanan kong panahon.”

“Igo na, Rey,” mibadlong si sister Veronica  nga mipasiklap sa iyang relo.” -- Sumpayan pa