Si Kumare Jelyn

Gula 2

Nasabtan ni Jomar ang problema ni Jelyn. Gibati’g kalooy si Jomar ngadto sa dalaga. “Asa man diay ang inyo Lyn?” gisukna ni Jomar ang dalaga aron paglingaw kaniya nga malimot sa iyang problema.

Dihang nasayran ni Jomar nga taga Barangay Labangon sa dakbayan sa Sugbo si Jelyn, dali niya kini nga gitanyagan nga magkuyog na lang sila sa pagpauli.

“Taga dakbayan sa Sugbo ‘sab ko Lyn ug mituyo lang pag-anhi sa department store sa Lapu-Lapu aron malingaw ug swerte ko nga gikakita ka karong hapona,” matud ni Jomar.

Miuban si Jelyn kang Jomar ug nanakay sila sa kotse sa ulitawo. “Datu ka diay Mar kay duna ka ma’y kotse. Patrabahoa na lang ko sa inyo bisan katabang na lang basta makakwarta,” ni Jelyn pa.

Ingon sa dili makatoo si Jomar nga motrabaho si Jelyn pagka katabang tungod sa iyang maanyag nga panagway. “Ikaw magkatabang?” giingnan niya ang dalaga.

“Ngano man diay? Wala ko magkomedya Mar. Nanginahanglan ko og kwarta kay wala na ko magtrabaho ug gikasuk-an na ko nila ni Papa ug Mama kay wala na man gud gi-renew ang akong contract,” ni Jelyn.

Wala makatingog dayon si Jomar. Naghuna-huna siya unsaon sa pagtabang ang dalaga. Iyang nahuna-huna nga makatabang tuod sa balay si Jelyn apan ang problema kay nagsabak ni.

“Nganong wala na man tuod ka tagda sa imong boyfriend. Wala ka ba’y sala kaniya?” gipangutana ni Jomar si Jelyn. “Wala g’yud,” mubo nga tubag sa dalaga.

“Lyn, sayo pa man, mohapit usa ta sa dakung mall diha sa unahan,” giingnan ni Jomar ang dalaga. Ang iyang gipasabot mao ang daku nga mall nga nahimutang sa Barangay Bakilid, Mandaue.

Human maka-parking sa sakyanan, mipaingon sila sa usa ka kan-anan ug miorder og makaon. “Dili man ‘sab ta gutmon kun ikaw ang akong kauban Mar,” matud ni Jelyn nga nagngisi.

Nakapahiyom ‘sab si Jomar. “Kana g’yud, gusto ko nga mo-smile ka ug kalimti ang imong problema. Ang problema adunay kasulbaran ug ayaw kabalaka, motabang ko nimo pagsulbad,” iyang giingnan si Jelyn.

Tapos sila makakaon, nanuroy sila si Jomar ug Jelyn sa mall. Nalantawan ni Jomar sa unahan ang iyang higala nga si Eli Espina nga nagtrabaho sa Cebu City Hall.

Midali pag-eskirda si Jomar aron dili sila makit-an. Tuod wala g’yud makakita kanila si Eli nga may gikaestorya nga tindera’g mga selpon.

Dali ra kaayo sila nga nagkasuod si Jelyn ug Jomar. Mibiya sila sa mall dihang misirado na kini mga alas nueve sa gabii. “Tana, ihatud na tika sa inyo Lyn aron ‘sab makatultol ko,” ni Jomar pa. - Sumpayan