Si kumare Jelyn

Nabatasan ni Jomar nga kun wala na siya’y trabaho adto g’yud siya maglingaw-lingaw sa mga department stores pinaagi sa pagtan-aw sa lainlaing mga baligya.

Gikan sa usa ka department store, muadto na usab siya sa laing tindahan. Suroyon niya ang mga department stores nga wala pa niya maadto, bisan og tua kini mahimutang sa silingan nga mga dapit.

Usa ka higayon miabot si Jomar sa dakbayan sa Lapulapu nga misuroy sa labing daku nga department store sa mao nga siyudad. Sa dayon pagpauli ni Jomar, mipahuway usa siya sa customer’s area ug wala dayon siya muadto sa iyang kotse.

Nakabantay si Jomar sa usa ka babaye nga naglingkud sa atbang nga lingkoranan. Maayo kini’g panagway, apan nakabantay si Jomar nga mora’g mabdos na ang maong babaye.

Mihulog og P20 si Jomar sa usa ka coffee vending machine aron kalingawan niya’g higop samtang magpahuway ug magpalabay og pipila ka gutlo. Gipasiklapan  niya ang babaye sa iyang atbang.

Hangtud nga ang duha ka laing mga tawo nga mipahuway ‘sab mibiya na ug mipaingon sa ilang sakyanan. Sila na lang ang nahabilin si Jomar ug ang babaye. Nakamatngon g’yud si Jomar nga masub-anon ang dagway sa babaye.

“May gihuwat ka miss? Can I offer you a juice drink?” giingnan ni Jomar ang babaye dungan sa paglingi niya sa vending machine ug nakita ang lainlaing matang sa juice drinks.

“Salamat,” tubag sa babaye. Mihulog si Jomar og P30 sa vending machine nga maoy kantidad sa juice drink. Dihang mihatag na ang vending machine sa juice, gikuha kini ni Jomar  ug miduol siya sa nahimutangan sa babaye. Iya kining gitunol.

Mipahiyom ang babaye nga mitutok kang Jomar. “Salamat ha? Nagtagad ka pa g’yud,” matud sa babaye dungan sa pagdawat sa gitunol ni Jomar nga juice drink. Mitupad si Jomar sa paglingkod sa babaye.

 Taud-taud, nagpaila si Jomar ngadto sa babaye dungan sa pagtunol niya sa iyang kamot. “Jelyn ang akong ngalan,” paila sa babaye ngadto kang Jomar. Nagkalingaw sila og sultihanay.

Gitug-anan ni Jelyn si Jomar nga miapas unta siya sa iyang boyfriend nga dugay na nga wala magpakita kaniya, apan wala na ‘sab diay mag-duty sa department store sa Lapulapu kay tua na ‘sab kini sa branch store nila sa Balamban madistino.

Mihilak ang babaye ug mitug-an kang Jomar nga nakasabot siya nga gisibat-sibatan na siya sa iyang boyfriend human masayud nga nagsabak na siya. Wala makatingog si Jomar nga mitutok kang Jelyn.

“Ayaw na paghilak Lyn, sige imna usa kanang imong juice,” matud ni Jomar dungan sa pagpikpik sa abaga sa dalaga. -- Sumpayan