Konsehal Bugtai maayong ehemplo

Hingatawa. Gaan og buot. Unya sobra kamahigalaon. Mao kini ang nakita ko diha sa kinaiya ni Hon. Marianito “Baby” Diaz Bugtai diha sa pagpangalagad sa iyang katawhan isip kugihan konsehal sa lungsod sa Sibonga, Cebu.

Sa miaging pipila ka adlaw, nakighinabi siya ning tagsulat, diin iyang giyagyag ang kamabination sa iyang pagkatawo. Matud niya, nindot gyud unta nga tanang kandidato, kinsa midaug sa eleksiyon, managhugpong sa ilang kamot ug magkahiusa sa pagpanerbisyo sa mga lungsoranon, kinsa midapig o mikontra man kanila. Nindot unta nga ang magkaatbang nga politiko human sa piniliay, makiglamanohay sa matag usa ug magtinabangay sa pagtukod og mga proyekto nga mapuslan sa mga lungsoranon. Sama sa damgo nga inig mata pagka-buntag, ang tanang maot nga daman kalimtan na. Ug maoy ipatigbabaw ang matuod nga gugma ngadto sa atong isig ka tawo.

Kun ang matang sa batasan sa tanang politiko pareha pa lang sa nahuptan ni “Baby” (iyang angga), pagkamauswagon ug pagkamalipayon unta sa atong nasud karon. Wala unta’y gutom. Wala unta’y krimen.

Si Konsehal Baby usa kanhi  ka opisyal sa PNP, SPO4 ang iyang ranggo. Bulawanon ang iyang agi. Maggilakgilak sa iyang dughan ang ubay-ubay’ng pasidungog nga naangkon gumikan sa pagkamatinud-anon diha sa iyang pagpangalagad isip tinugyanan sa balaud. Daghang dagkong kaso nga nasulbad ni Baby. Usa na niini kadtong idlas ug banggiitang Allega Gang sa Labangon ning dakbayan, diin nabuhatan gani to’g pelikula nga miklik sa takilya.

Pagretiro ni Baby sa iyang pagka-pulis, gipugngan siya ni General Garbo kay gianugonan ang ilang labaw sa kalantip og salabotan ni Baby nga mohimo’g inantigong mga lakang unsaon pagsulbad sa mga delikadong kaso. Dakong bahandi si Baby sa mga mata ni Garbo ug sa iyang mga kauban sa buhat. Bisan si Ret. Col. Rico Palcuto nakadayeg sa iyang mga hiyas.

Sakit man, gidawat ni Gen. Garbo ang pagretiro ni Baby. Gitalikdan niya ang kinabuhi sa military ug misulay pagsulod sa kalibotan sa politika. Midaog siya pagka-konsehal sa lungsod sa Sibonga. Kabuotan. Kakugi. Ug kamahigalaon  maoy gihimo niyang puhonan. Sa miaging piniliay, midaug gihapon siya. Timaan, nga na-inlab na ang taga Sibongahanon sa mga sulundong buhat nga iyang gitanom sa tagsatagsa nila ka mga kasingkasing.

Ultimo si Bitin Simmon, kinsa alalay niya kaniadto sa military, miingon: “Kana si Konsehal Marianito Bugtai, bisan asa na ipadpad, maayo gyud kaayo na siyang himuong ehemplo sa katawhan.