Kahinam human sa pagsulay

Alas onse na lang sa kagabhion diha gihapon sa sala si Ramon sa iyang kondominyum. Wala batia og katulogon. Nahasol ang hunahuna tungod sa batasan ni Linda nga wala niya mahi’uyoni.

Si Linda usa sa mga ahente nga mitanyag kang Ramon pagpalit og kondominyum. Nakapalit si Ramon og kondominyum tungod sa ka’maayong mopasabot ni Linda sa mga paagi pag-angkon sa kondominyum nga sayon bayaran pinaagi sa data-data. Ang madanihon niyang panagway ug ma’abi-abihon nga kinaiya maoy nakakabig sa kasingkasing ni Ramon. Gipangulitawhan siya ni Ramon ug nahimong hinigugma.

Ganinang hapon, sa pagbisita ni Ramon ni Linda; namatikdan ni Ramon nga gisayonsayon lang pagsugo ni Linda ang iyang inahan. Mora’g nagmandar og sulugoon; pagpa-abli sa pultahan, pag-abi-abi, ug pagdalit sa ilang giinom nga pabugnaw. Wala damha ni Ramon nga may hiwi diay kini nga batasan.

Gikan sa sala, mibalhin si Ramon ngadto sa pantaw sa kondominyum aron mohanggap sa huyohoy sa nagkalawom nga kagabhion. Ang kakamig sa hangin wala makapabugnaw sa kainit sa iyang hukom nga daygan si Linda sa gibati niyang kahasol.

Gitawagan ni Ramon si Linda.

“Nganong mitawag ka niining lawom na nga kagabhion? Aduna bay dautan nga mga panghitabo?” pangutana ni Linda nga nakaila dayon sa tingog ni Ramon.

“Nothing serious! Nahasol lang ko Bebs sa imong gibuhat ganinang hapon. Gihimo nimong sulugoon ang imong Mama. Nalooy ko nga nagtan-aw kaniya. Mahimo ba nga dili mo na ako pakit-on pag-usab sa imong gibuhat kaniya Bebs? I love you Bebs!” pahinumdom ni Ramon nga puno sa salabtunong pagmahal.

“Mao ba!” ni Linda nga kataw-onon. “Ang imong namatikdan gahapon; usa lang ka pagsulay kun higugmaon mo ba gihapon ang akong pagka-ako. Salamat sa imong gugma nga nagpabiling tim-os bisan sa kahiwi sa akong batasan. Dili masukod ang gibati kong kalipay sa imong pagkamatinud-anon. Malipayon akong motugyan sa akong kaugalingon aron pagmatuod nga gihigugma ko usab ikaw sa hingpit. I love you Bebs!” ni Linda sa paraygon ug madanihon nga tingog.

Ang kaparaygon sa tingog ni Linda nanganaykanay sa kaugatan ni Ramon. Wala niya kapugngi ang paghangyo:

“Can we make love on the phone?”

“Why on the phone; you can come, am alone.”

Wala maglangan si Ramon. Nagsapidsapid ang tiil nga nanaog aron  adtoon si Linda; naghinam-hinam nga nagpaabot kaniya. (Katapusan)