Isla Paraiso

Gula 45

Wala dangti’g dugay, may miduol kang Rey nga seksing silbidora. Mi-order gilayon siya’g tulo ka botelyang serbesa ug mani. Mibiya gilayon ang batan-ong tig-alagad sa iyang atubangan. Wala madugay, nahibalik kini nga nagdala na sa iyang gi-order.

Gitungab gilayon ni Rey ang usa ka botelya nga puno sa serbesa. Natagamtam niya ang kapait sa beer. Apan ang kapait niini dili ikatandi sa kapait sa iyang kahimtang karon. Gibati niya nga giayran siya ni sister Veronica. Duha na ka higayon nga wala kini moatubang kaniya sa iyang pagpamisita. Tataw kaayo nga buot na gayod kining molikay kaniya sa hingpit.

Mitungab na usab siya pag-usab sa beer nga diha sa botelya. Mitungab ug mitungab. Dili siya makatugot nga magpadayon si sister Veronica sa paglikay kaniya. Gusto kini niyang makita kanunay. Gustong ikasulti ug halaran sa tim-os niyang pagbati. Buot niyang ipabati  sa  babaye ang inagulo sa iyang kasingkasing.

Karon nga nagkita sila pag-usab ni Veronica dinhi sa Sugbo, kinahanglang maangkon na niya ang gugma niini. Makahimo si Veronica sa paggawas sa kombento kun dawaton niini ang iyang gugma.

Apan dawaton gayod kaha ni sister Veronica ang iyang gugma nga milikay na man gani hinuon kini kaniya karon? Dinhing bahina nga ingon sa nalumoy si Rey. Wala siya masayod kun unsay angay niyang buhaton karon. -- Sumpayan pa