Lisod ang biyahe gikan Tacloban paingon sa Cebu

Human makita ni Doming Juguilon ang iyang pamilya nga septi ra diay tanan ug mahimo rang kabiyaan sanglit ubay-ubay man ang ilang stock sa sinakong bugas ug mga lagutmon, nakahukom siya nga mobalik nag trabaho sa siyudad sa Sugbo. Nagtuo siya nga sayon ra. Apan pagkalisod diay!

Didto siya maproblema pag-abot sa pantalan sa Ormoc City. Puwerting taasa sa linya sa mga pasahero nga gustong mobiyahe paingon sa Sugbo. Tiaw bay, kun moapil siya sa linya, ika 6,001 (six thousand one) siya. Unya, ang passenger’s capacity sa fast craft, pila ra man intawon? Gani, matud pa ni Doming, sagad sa mga nanaglinya, misakripisyo gyud gikan sa duha ngadto sa tulo ka adlaw ayha pa nakalukat og tiket sa barko. Lisod, uy! Di niya kaya. Duha ngadto sa tulo ka adlaw nga paglinya? Wala’y tulog-tulog? Paita!

Nangita’g paagi si Doming unsaon paglusot sa maong dakong babag sa iyang pagbiyahe sa Cebu. Hangtod nga may nahunahunaan siya.

Dinhay magtiayon kuyog sa bugtong nilang anak nga dinha na magbarog duol sa lukatana’g tiket. Nagsugo si Doming og kargador sa piyer nga estoryahon ang maong magtiayon bahin sa iyang hangyo nga i-apil na lang si Doming sa pagpalit nila’g tiket ubos sa kondisyon nga siya nay bahala sa balayranan nilang tanan. Misugot ang magtiayon. Nalipay ug nagpasalamat pa! Kay isip biktima sa super typhoon, sila sa kuwarta, naglisod na!

Nasulbad ang dakong suliran ni Doming. Nakareport siya’g balik sa iyang trabaho on time. Apan nakonsensiya siya. Niadtong liboan ka naglinyang tawo nga iya lang gi-obertikan. Ning brilliancy nga iyang nabuhat ngadto sa iyang isig ka tawo, siya hugot nangayo og dakong pasaylo kanila. Ug labaw sa tanan, ngadto sa atong Magbubuhat, kinsa mipakita nag signs of time nga Siya hapit na mobalik dinhi aron paghukom natong tanan, patay man o buhi.