Ang Santa Claus ug si Melagros

Matahom si Melagros nga pagka dalaga. Usa siya ka maestra sa elementarya. Niining Disyembreha, sa ilang pagbakasyon nga tuiga, tungod gikasabotan na sa ilang prinsipal sa eskuylahan nga si Mr. Jesus Catre siya ang nahimong bida.

Tungod lagi kay si Melagros, may hinigugma man usab nga usa ka maestro nga si Mr. Rodrigo Montecillo, nga sama usab kaniya nagtudlo sa usa ka elementarya didto sa bukid nagkasabot usab sila nga motambong gayud kini sa ilang Christmas Party/Program uban sa ilang mga tinudlo-an nga kabataan.

Diha sa ilang eskuylahan si Mr. Austolio Villacorta, nga maoy tag-iya sa sound system nga maoy moduyog gayud sa ilang ‘christmas party/program nga himuon gayud karon nga gabhiona.

Busa nag-ilis na gayud si Melagros ning gabhiona, ug nagpaguwapa. Nagpahumot sa pahumot nga iyang inutang ni Pedro Bayot, nga maoy tag-iya sa usa ka beauty salon sa  ilang lungsod. Kining maong Beauty Salon nagpaabang usab sila alang sa mga biste sa kasal. Ug gani maoy mga plano nila ni Melagros ug Rodrigo nga anha sa ilang eskuylahan gayud himua ang ilang programa. Naghinamhinam na usab kaayo si Melagros nga magkasayaw sila si Rodrigo ning gabhiona.

Nahaigking si Melagros sa pagkuriring sa iyang cellphone sa sulod sa iyang bolsa. Gikuot niya kini ug gitapion sa tuo niyang dalunggan, ug mitubag:

“Hello? Si kinsa ba ang mitawag kanako, ning gabhiona? Puyde ba masayod kun si kinsa kini?’ ni Melagros pa nga mipahiyom ug mikatawa.

“Ros, karon diha sa inyong eskuylahan si Santa Claus moabot. Andam kana ba?”

“Oo, Rod, andam na ako makigsayaw unya, kanimo” tubag usab ni Melagros sa iyang hinigugma nga si Rodrigo.

“Tuod diay Rod, unsa may pinaskohan nga imong ihatag kanako? Singsing ba o kwentas? Tug-ani lagi ako Rod, kun unsa kana?”

“Mahibaw-an ra unya kana kanimo, Ros... Kun unsa gayud kini?” ni Rodrigo pa, nga sa iyang celphone nga Nokia usab mipahiyom nga mikatawa.

Naglanoglanog na diha sa sayawan elementary school  ang mga paskohanong tugtog. Gikan sa mikropono ang tingog sa Prinsipal nga si Mr. Jesus Catre, nanawagan na sa mga magtutudlo sa eskuylahan. Mao kini ang mensahe ni Mr. Jesus Catre”. Sugdan na nato karon ang Christmas Party/Program mga kahigalaan. Ug kinahanglan kitang tanan, mga magtutudlo moduol na gayud diri labi na ni Miss Melagros, nga maoy mohatag sa pangalan sa atong Santa Claus karong gabhiona!” matud pa ni Mr. Jesus Catre, ang Prinsipal sa eskuylahan.

“Daghang salamat, kanimo Sir,” tubag usab ni Melagros nga mipahiyom usab nga nagngise.

“Mga kahigalaan, ania si Santa  Claus, uban karon, kanato! Aron siya manghatag og mga gasa sa mga kabataan, ug sa ilang mga ginikanan!” ni Melagros pa nga mitawag ni Santa Claus.

Sa pagpaso na ni Rodrigo sa libot diha sa sayawan, gikagubtan siya sa mga kabataan, ug sa mga ginikanan. Hasta usab sa mga bisita nga katawhan.

Unya, nagsayaw sila si Melagros ug si Santa Claus. Pagbukas pa sa iyang maskara. Naninggit ang mga bata sa kalipay: “Hala, si Sir Rodrigo ug Ma’am Melagros magminyo na! Kay anaay  singsing ug kwentas nga ilang kinuptanan!” matud pa sa mga estudyante nga kabataan ni Melagros. Nga nakaila na kaayo sa ilang Sir Rodrigo, ang pamanhunon sa ilang Ma’am Melagros. (Katapusan)