Wala pili-a

Dear Tita Salie,

Maayong adlaw. Gusto lang unta kong magpatambag kanimo sa akong problema karon tungod kay halos dili na nako makaya ang kasakit nga akong gibati karon.

By the way, just call me Jason Guaio of Inabanga, Bohol, usa ka ulitawo ug nagproblema ko sa akong lovelife.

Duna man god koy crush, ganahan kaayo ko niya. Apan since duna siya’y uyab ako na lang kining gitago. Apan dihang nilarga sa Manila ang iyang uyab naghinayhinay usab ako sa pagpaduol kaniya ug nagkasuod ming duha, ug hangtud nga ako gyod siyang gipanguyaban.

Wala madugay iya kong gisugot kay kuno wala na sila sa iyang uyab ug nalipay ko pag-ayo, Tita. Apan usa ka higayon mipauli ang iyang kanhi uyab, ug nagkita ug nagkaestorya mi ug miingon siya nga “mag-unsa pa man ka sa ilaha nga nagbalik na man mi?”

Midali ko pag-adto sa balay sa akong uyab ug ako siyang gipangutana ug gipapili. Gisakitan ko, Tita, kay wala man ko niya pilia ug ang kanhi niyang uyab ang nabulahan. Gisakitan ko pag-ayo ug hangtud karon makahilak ko kun ako kining mahinumdoman. Unsa may akong buhaton? Palihog pasabta ko. Daghang salamat.

* * *

Dear Jason,

Ayaw kalimti nga igo ka lang nipuli sa nawala nga tawo o lalaki diha sa dughan sa usa ka babaye. Dili gyod ikaw ang tag-iya niini, dili gyod ikaw ang nag-una didto sa iyang kasingkasing kay igo ra man ka nga nipuli sa dapit sa iyang uyab nga nilarga. Ug tingali love gyod kaayo sa imong uyab ang iyang uyab sa una ug wala ka makatupong niini.

Pasalamati na lang ang panahon nga gihatag  kanimo aron higugmaon siya. At least nasuwayan nimo ang mahigugma kaniya ug iyang gi-welcome ang imong gugma. At least prangka siya ug gisultian ka niya nga mobalik siya sa una niyang gugma ug wala mo niya  lumponga. Nagpaila lamang kini  nga buotan siyang pagka-babaye ug dili gustong dunganon mo diha sa iyang dughan.

Of course, sakitan gyod ka nga modawat sa kamatuoran, apan karon lang na, after a month mawala ra na. Isipa lamang nga part lang sila sa imong kasinatian nga dili mahimong likayan. Ug karon isipa silang imong mga higala ug angay pasalamatan. -- Tita Salie